په ایران کې دولتي مطبوعاتو یکشنبه جنوري ۲۱ (سلواغې لومړۍ) ویلي چې ددې هیواد په جنوب کې یو جلب شوي شوي عسکر پنځه سرتیري وژلي او پخپله یې د سیمې څخه تښتیدلی دی.
د ارنا دولتي خبري اژانس په راپور کې ویل شوي چې پیښه د کرمان په ولایت کې شوې او لا معلومه نده چې دې برید کوونکي ولې خپل ملګري وژلي دي.
د پوځ یو افسر د ارنا خبري اژانس ته ویلي، "نن ماښام یو سرتیري چې په یو نظامي ځای کې یې د یوې قطعې پیرې کولو دنده درلوده، د سرتیرو د آرام کولو ځای ته ورغلی او پخپلو ملګرو یې ډزې کړي چې انګیزه یې لا معلومه نده".
دي جګپوړي نظامي چارواکي دا ندي ویلي چې برید کوونکي څوک و خو دومره یې ویلي چې تر برید وروسته هغه په تیښته بریالی شوی او دا چې د نیول کیدو لپاره یې هلې ځلې روانې دي.
د پوځ دې افسر ویلي، " له بده مرغه پدې ډزو کې پنځه سرتیري وژل شوي".
د کرمان په ولایت کې دا ډول پیښې ډیرې لږې کیږي. په همدې ښار کې د روانې جنوري میاشتې په دریمې نیټې د قُدس ځواکونو یو پخواني جنرال قاسم سلیماني د دریم تلین په مراسمو کې کې غبرګ ځانمرګي بریدونه وشول چې ایراني چارواکو ویلي ۹۴ تنه پکې وژل شوي و.
د اسلامي دولت یا داعش ډلې ادعا کړې وه چې دا بریدونه هغوي کړي و.
د ایران پوځ د دې بریدونو څخه وروسته په عراق، سوریې او پاکستان کې ځیني ځایونه په توغندیو او بې پیلوټه یا ډرون الوتکو وویشتل.
د کرمان په ولایت کې د پوځ په روزنیز مرکز کې د دې پنځو سرتیرو تر وژل کیدو یوه ورځ وړاندې د سوریې په پایتخت دمشق کې په یو کور چې د سپاه پاسداران انقلاب غړي پکې اوسیدل، توغندی ولګید چې ۱۳ کسان پکې ووژل شول.
د ایران سپاه پاسداران انقلاب ځواکونو ویلي چې پنځه وژل شوي د دوي غړي و. د مهر خبري اژانس د یوې باخبره سرچینې په حوالې بیا ویلي چې پدې برید کې د سوریې لپاره د ایران د سپاه پاسداران استخباراتي مشر او مرستیال یې وژل شویدي.
سره لدې چې ایران په رسمي توګه دا نده تائید کړې خو په مطبوعاتو کې ویل شوي چې په سوریه کې د قُدس ځواکونو د استخباراتو مشر جنرال صادق امیدزاده پدې برید کې وژل شوی.
د ایران جمهورر ئیس ابراهیم رئیسي دا برید ، "بزدلانه" بللی او هوډ یې څرګند کړی چې غچ به یې اخلي.
د سوریې د بشري حقونو څار اداره چې مرکز یې په بریتانیې کې دی خو د سوریې کورنۍ جګړې په هکله د معلوماتو راټولولو لپاره پدې هیواد کې پراخې شبکې لري، د یکشنبې په ورځ یې ویلي چې په ۱۳ وژل شویو کې پنځه یې ایرانیان، څلور یې سوریایان چې د ایرانیانو سره یې کار کاوه، یو یې د سوریې غیر نظامي، دوه یې د لبنان او یو یې د عراق تبع و.
فورم \ دبحث خونه