د افغانستان په نیمروز کې طالب چارواکي وايي چې په سرحد کې د طالبانو او ایران سرحدي ځواکونو ترمنځ نښته شوې او لږ تر لږه یو تن په کې وژل شوی دی.
په نیمروز کې د طالبانو د حکومت د امنیې قوماندانۍ ویاند بهرام حقمل رویټرز خبري اژانس ته ویلي دي چې دا پېښه د یکشبنې په ورځ جولاۍ ۳۱ (زمري نهمه) رامنځ ته شوې ده.
نوموړي ویلي دي: «موږ یو مړی او یو ژوبل لرو. د جګړې علت لا معلوم نه دی.» هغه وضاحت ورنکړ چې وژل شوی کس څوک دی.
په ایران کې د هیرمند د سیمې والي میثم برازنده د ایران رسمي خبري اژانس فارس ته ویلي دي چې اوس جګړه درېدلې ده او کوم تلفات نلري.
د تسنیم خبري اژانس وایي چې جګړه هغه مهال پيل شوه چې طالب جنګیالیو په داسې «یوې سیمې کې د خپل بیرغ درولو هڅه کوله چې د افغانستان برخه» نه وه.
لا د طالبانو د حکومت د کورنیو او بهرنیو چارو وزارتونو په دې اړه په رسمي ډول څه نه دي ویلي.
تر دې مخکې هم د ایران د سرحدي ځواکونو او طالبانو ترمنځ جګړه شوې وه.
طالبانو د ۲۰۲۱ د اګست په ۱۵ نېټه په افغانستان کې واک ترلاسه کړ، خو حکومت یې تر اوسه د پاکستان او ایران په ګډون د هیڅ یو هیواد له لورې په رسمیت ندی پیژندل شوی.
