اوس په سعودي عربستان کې میرمنې هم کولای شي د نارینه وو سره یوځای د لوبو لیدو ته ورشي.
د سعودي عربستان چارواکو له لسیزو وروسته د خپل هيواد په قوانینو کې د بدلون په راوستو سره میرمنو ته دا اجازه ورکړه چې لوبغالو ته ولاړي شي او لوبې له نږدې وګوري.
اریج الغمادي به تل د خپلې خوښې وړ فوټبال لوبه له کوره لیده خو د جمعې په ورځ هر څه بدل شول ځکه سعودي عربستان میرمنو ته د لومړي ځل لپاره دا اجازه ورکړه چې له نارینه وو سره یوځای لوبغالي ته ولاړې شي.
د پوهنتون دغه محصله د هغو ۳۰۰ سعودي میرمنو په ډله کې وه چې د جدې ښار د فهد شاهي نړیوال لوبغالي کې د فوټبال لوبې لیدو ته ورغلې وه.
د سعودي عربستان چارواکو له لسیزو وروسته هغه سخت قوانین چې له مخې یې نارینه او میرمنې سره بیلې شوې وې، ساده کړل.
غمادي چې د سعودي عربستان د غوره لیګ سیالیو په لړ کې د ال اهلي او ال باطن لوبډلو د لوبې د لیدو لپاره لوبغالي ته تللې وایي: "زه له خپل پلار او ورور سره د ال اهلي لوبډلې د لوبې لیدو لپاره راغلې یم."
الغمادي وایې له دې وړاندې یې خپله د خوښې وړ لوبډلې لوبه یوازې د ټلویزیون پر پرده لیده "دا لوبډله مو ډیره خوښه ده، پخوا به زما ګڼ شمیر خورلڼې د لوبې د لیدو لپاره زموږ کور ته راتلې خو دا لومړی ځل دی چې لوبه د ټلویزیون پر پرده نه بلکې له نږدې ګورو."
که څه هم دغه لوبه په سیمه ييز وخت د ماښام په اتو بجو پیل شوه خو میرمنې د ډیرې لیوالتیا له امله دوه ساعته مخکې لوبغالي ته راغلي وې.
سعودي عربستان چې په نړۍ کې پر میرمنو د محدودیتونو له پلوه تر ټولو محافطه کاره هيواد دی، له کلونو راهیسې یې د خپلو سختو قوانینو سره په عام محضر کې نارینه او میرمنې په ورزشي ډګرونو کې سره بیل کړي وو.
خو اوس د سعودي عربستان پر وروستیو اقدامات ټول په ځانګړې ډول میرمنې ډیرې خوشاله دي.
لامیه خالد نصیر وایي: " دا محفل ددې ښکارندويی کوي چې موږ د یوې روښانه راتلونکي په لور روان یو. ډیره خوښه یم چې نن ددې ستر بدلون شاهده یم."
د جدې یوه بله اوسیدونکي رویدا علي قاسم وایي: "دا په عربستان کې تاریخي ورځ ده او موږ د بنیادي بدلونونو شاهدان یو."
هغې زیاته کړه "ویاړم او ډیره خوشاله یم چې په خپل هيواد کې ددې پرمختګ شاهده یم، هغه ټولنیز حق چې ډیر هيوادونه ورڅخه برخمن دي."
یوه بله میرمن وایي "موږ داسې فکر نه کاوه چې هر څه داسې ښه شي. دلته د ټکټونو دخرڅلاو په ګډون هر څه په منظم ډول سمبال شوي دي. د میرمنو او نارینه وو لپاره امنیت هم نیول شوی دی."
د سعودي عربستان د اوسنیو قوانین له مخې، د پلار، خاوند او ورور په شان د کورنۍ یو غړی باید میرمنو ته د زده کړو، سفر او په نورو فعالیتونو کې د برخې اخیستنې اجازه ورکړي.