په پاکستان کې چارواکي وايي یو ځانمرګي برید د دغه هېواد په بلوچستان ایالت کې شاوخوا ۲۰ تنه ووژل او شاوخوا ۳۰ نور یې ژوبل کړل.
برید د صوفي په زیارت کې شوی دی. اسوشیتډ پرس وايي د برید مسولیت د داعش ډلې منلی دی.
چارواکي وايي یو پولیس ځانمرګی وپېژنده او نیولی خو بیا یې هم ځان والوزوه. د بلوچستان ایالتي وزیر سرفراف بګتي رویټرز ته وویل چې د پولیس دغې قربانۍ د ډېرې مرګ ژوبلې مخه ونیوله.
زخمیان روغتونونو ته انتقال شوي او ویل کیږي چې د ځینو روغتیايي حالت ښه نه دی. د کوټې په ۴۰۰ کیلو مېترۍ کې د جل مکسي زیارت کې ډېر خلک راټول شوي وو، هلته د یو سیمه ییز مشر فاتحه وه چې ځانمرګی برید وشو.
دا ډول بریدونه د چین او پاکستان ترمنځ د اقتصادي پروژې د امنیت په اړه اندېښنې زیاتوي، د میلیاردونو ډالرو په ارزښت دا پروژه د دواړو هېوادونو ترمنځ تر ټولو لویه اقتصادي پروژه بلل کیږي.
د تېرکال د نومبر په میاشت کې هم د بلوچستتان د صوفیانو په یو بل زیارت کې ځانمرګی برید وشو،لږ تر لږه ۵۲ تنه یې ووژل او ۱۰۰ نور یې ژوبل کړل او مسولیت هم د داعش ډلې واخیست.
