اروپايي ټولنې د کروناویروس د مخنیوي او په دې برخه کې د نړیوالو هڅو د پیاوړتیا لپاره د ۲۳۲ میلیون ایرو مالي مرستې اعلان وکړ.
اروپايي ټولنې ویلي چې د دغو پیسو یوه برخه همدا اوس مختلفو برخو ته ځانګړې کېږي او په راتلونکو میاشتو کې به یې پاتې برخه هم برابره شي.
دغې ټولنې په یوې اعلامیه کې د اروپا کمېسیون د رئیس اورسولا ون در لین له قوله لیکلي: "د پېښو د شمېر زیاتوالي ته په پاملرنې، عمومي روغتیا په لومړیتوب کې ځای لري، که دا په اروپا، چین او یا بل هرځای کې د تیاریو د زیاتوالي لامل شي، نړیواله ټولنه باید سره همکاري وکړي".
همدا شان اعلامیې په اروپا کې د بیړني حالت د ځواب ویلو همغږۍ کوونکي او د بحراني وضعیت د مدیریت کمېشنر یناز لنارشیچ له خولې ویلي، چې د ۲۶۰۰ تنو په مړه کېدو سره، اوس په ټولو برخو کې له چمتوالي پرته بله لاره نشته.
هغه زیاته کړې ده: "زموږ د مرستو نوې کڅوړه د روغتیا نړیوال سازمان څخه د بودجوي ملاتړ په موخه ده، ترڅو هغه هېوادونه چې کمزوری روغتیایي سیستم لري شاته پاتې نشي. زموږ هدف په نړیواله کچه د دغې ناروغۍ د پراخېدو مخنیوی دی".
د اروپايي ټولنې د ۲۳۲ میلیونه ایرو مرستو له شمېرې به ۱۱۴ میلیونه یې د کروناویروس سره د مبارزې لپاره د روغتیا نړیوال سازمان ته ورکړل شي.
په افغانستان کې د اروپايي ټولنۍ استازولۍ ویلي، چې افغانستان به هم له دغې مرستې برخمن شي.
د افغانستان د روغتیا وزارت په دغه هیواد کې له کروناویروس سره د مبارزې لپاره د ۲۰ میلیون ډالرو بودجې اټکل کړی دی.
د افغانستان د روغتیا وزیر فیروزالدین فیروز ویلي، دغه وزارت له کروناویروس سره د مبارزې لپاره اوس ۵ میلیونه ډالر په واک کې لري، چې دوه میلیونه یې افغان حکومت او درې میلیونه یې د روغتیا نړیوال سازمان ورکړي دي.
