د متحده ایالاتو د استازو په مجلس کې جمهوري غوښتونکي استازي جو ویلسن د ایران اسلامي جمهوریت "دیکتاتوري" وباله چې د هغه په وینا د ایران په وګړو ظلم کوي.
ښاغلي ویلسن ایران کې په هنرمند توماج صالحي باندې د مرګ سزا په غبرګون کې د امریکا غږ فارسي څانګې سره په مرکې کې وویل، "د ایران رژیم دیکتاتوري دی چې د ایران ولس ځپي او مونږ یې هره ورځ وینو. مونږ په واقعیت کې د ایران ولس او تاریخي میراث ارزښتناک بولو".
د رپ موسیقۍ دا هنرمند، توماج صالحي چې د ایران په اسلامي جهوریت باندې انتقادي سندري وایي او له همدې کبله یې نوم ګټلی، د ۱۴۰۱ کال په مظاهرو کې ونیول شو او یوې محکمې پرې څو ورځې وړاندې د مرګ سزا وخیژوله.
په صالحي باندې د اعدام سزا راختلو وروسته په ایران کې دننه او د دې هیواد څخه د باندې د بشري حقونو ادارو او د ځینو هیوادنو مشرانو انتقادونه وکړل او د دې هنرمند د ملاتړ لپاره په پراخه توګه کمپاین پیل شو.
د استازو مجلس یو بل دیموکرات غړي، ایډم سمیت بیا په صالحي باندې د مرګ سزا په هکله په غبرګون کې امریکا غږ ته وویل، " هغه څه چې د ایران رژیم یې پخپل ولس کوي، ورانوونکي دي او له همدې کبله مو پدې تیرو څو اوونیو کې د ایران په رژیم د پام وړ بندیزونه ولګول".
د محکمې د حکم پر ضد د پراخو مظاهرو او دا چې په ټولنیزو شبکو کې د هغه په هکله خبرونه زیات شول، په زندان کې دننه په هغه لا ډیر محدودیتونه ولګیدل.
ددې معترض سندرغاړي مدافع وکیل امیر رئیسیان د اکس په شبکې کې ویلي چې د شنبه غوایي اتمه راهیسې د ښاغلي توماج صالحي سره ټیلیفوني اړیکې په ټولنیزو شبکو کې د اطلاع ورکولو له کبله بندې شویدي.
په عین حال کې په ایران کې د هرانا په نامه د خبریالانو د بشري حقونو مدافع سازمان په یو راپور کې ویلي چې د اصفهان په ښار کې د دستګرد زندان مسؤلینو په زندان کې د تګ راتګ، د نورو زندانیانو سره د خبرې کولو، کتابونو ته د لاسرسي او ورزش کولو څخه منع شویدی.
فورم \ دبحث خونه