په کندهار کې په نشه يي توکو د اخته کسانو په منځ کې د شیشې کاروونکي ورځ تر بلې پر ډېرېدو دي چې د دغه ولایت د اوسېدونکو اندېښنې یې راپورته کړې دي.
د کندهار د ولایتي شورا مسئولین وايي چې د دغه نویو موادو له امله د سلګونو ځوانانو ژوند له تباهۍ سره مخ دی چې باید مخنیوی یې وشي.
په کندهار او جنوبي ولایتونو کې د نشه يي توکو د استعمال په برخه کې د میتامفیتامین یا سیښې د پراخ استعمال په اندېښنې ورځ تر بلي زیاتيږي.
د کندهار ولایتي شورا وايې چې پدې ولایت کې په یاده نشه د نویو ځوانانو روږدېدل د جدي اندېښنې وړ مسئله ده.
د ولایتي شورا ریس سیدجان خاکرېزوال وايې چې د ځينو کورنیو د بې پروايي له کبله هره ورځ لس ګونه نوي ځوانان په نشه روږدي کيږي.
هغه وايي "دا حالت بیخې د زغم نه دی، تر انفجار دا عمل زموږ د ټولنې لپاره خطرناک دی، په سلګونو ځوانان مو د ښار په مرکزي جاودو کې بې سرنوشته پراته دي، کورنۍ باید د خپلو ځوانانو نظارت زیات کړي او حکومت ته مو ویلي چې د درملني امکانات دې زیات کړي".
عمومي اندېښنه داده چې د نشه يي توکو د پراخ استعمال په وجه ګڼي هره ورځ نوي ټولنيزې ستونزې هم رامنځته کیږي.
روغتیايي مسئولین سره له دې چې د معتادینو د درملنې په برخه کې خپل امکانات محدود ګڼي تر څنګ يې د قانون له پلي کونکو بنسټونو څخه غوښتنه لري چې د نشه يي توکو د مخنیوي لپاره دې کوټلي ګامونه پورته کړي.