په کندهار کې نوي ټاکل شوي ولسوالان وايي چې له نشه يي توکو سره مبارزه یې د کار په لومړیتوبونو کې راځي.
دغه ولسوالان وايي چې د خلکو په مرسته به پر داسې لارو چارو غور وکړي چې ورسره د نشه يي توکو کښت او کاروبار له منځه یوسي.
د کندهار ژړۍ یوه له هغو ولسوالیو څخه ده چې تېر کال په کې د نشه يي توکو پراخ کښت شوی وو.
د یادې ولسوالۍ لپاره نوی ټاکل شوی ولسوال جان محمد اشنا تلویزیون ته وویل چې د نشه يي توکو کښت تر ډېره په نا امنه سیمو کې تر سره کیږي.
هغه وايي چې د نشه يي توکو د کر د مخنیوي لپاره په سیمه کې امنیت تر ټولو مهمه اړتیا ده چې د ټېنګښت په لار کې به یې دوی موثرې هڅې وکړي.
جان محمد وايي " له خلکو سره به له نږدې کار کوو، عامه پوهاوی به ورکوو، چې د نشه يي توکو له کرلو لاس واخلي، ځکه دا زموږ ځوانانو او ټولو ته خورا مضر دي".
دغه راز د کندهار په جنوب کې ریګستان ولسوالي بیا یوه له هغو سیمو څخه بلل کیږي چې د نشه يي توکو قاچاقبر ورڅخه د عبوري لارې په توګه کار اخلي.
د نوموړي ولسوالۍ نوی ټاکل شوی ولسوال حاجي عبدالباري وايي د سیمه ييزې اردو د جوړېدو له لارې غواړي چې په ریګستان ولسوالۍ کې د نشه يي توکو د قاچاق مخنیوی وکړي.
کندهار ټولي ۱۷ ولسوالۍ لري چې تازه يې ۱۵ ولسوالیو ته نوي ولسوالان ور وپېژندل شول.
د کندهار په پنجوايي، ژړۍ، میوند، شاه ولیکوټ او خاکریز ولسوالیو کې تېر کال د نشه يي توکو پراخ کښتونه شوي ول.
د کندهار د بېلا بېلو ولسوالیوالو لپاره ټاکل شوي نوي ولسوالان ټينګار کوي چې د نشه يي توکو سره پراخه مبارزه به يې د کار په لومړیتوب کې وي.