لسګونه کورونه او چهارديوالۍ چې ويل کيږي، پر غصب شوې دولتي ځمکه جوړ شوي، د لوګر د يو شمېر ملکي حکومتي چارواکو او امنيتي منسوبينو پر وړاندې د تېرو دوو ورځو په ترڅ کې ونړول شول.
د لوګر د والي مرستيال محمد نبي احمدزي خبريالانو ته وويل، چې د دولتي غصب شوو ځمکو د راګرځولو دا لړۍ به درې مياشتې دوام وکړي او پر مرکز سربېره ولسواليو ته هم غځول کيږي.
هغه وويل:”پرون مو په برکي کې کورونه ړنګ کړل، خوښۍ ته به ځو، التمور دښتې ته به ځو، محمد آغې ته به ځو، هر هغه څوک چې د قانون خلاف عمل کوي، له دې نه وروسته به يې پرضد عکس العمل کيږي‟.
تر دې مخکې د لوګر پر ولايتي چارواکو دا تور لګول کيده، چې ګوندې د ځمکو له يو شمېر غصب کوونکو سره لاس لري او له همدې کبله ولايتي اداره د غصب کوونکو پرضد جدي ګام نه اخلي.
مګر د لوګر د والي مرستيال محمد نبي احمدزی ټينګار لري، چې دا ځل يې شروع کړې مبارزه جدي ده. هغه په دې برخه کې د امنيتي ادارو پر قاطعيت هم ټينګار وکړ.
که څه هم خاص شمېر نشته، خو د ځينو تقريبي شمېرو له مخې د لوګر په مرکز پل علم او يو شمېر ولسواليو کې زر ګونه جريبه دولتي ځمکه خلکو غصب او کورونه يې پرې جوړ کړي دي.
د لوګر امنيه قوماندان مل پاسوال رحم خُدا مخلص وايي، چې د تېرو څو مياشتو په موده کې يې د دولتي ځمکو د غصب په تړاو تر ۶۰ ډېر کسان نيولي، عدلي او قضايي ادارو ته يې سپارلي دي.
د لوګر د مرکز پل علم ترڅنګ، خوښۍ، محمداغه او برکي برک هغه ولسوالۍ دي، چې د چارواکو په وينا نسبت نورو سيمو ته پکې ډېره دولتي ځمکه د خلکو له لوري غصب شوې ده.
