د طالبانو یو ویاند وایي د هغوئ د ډلې دا پنځه غړي چې د یو نیول شوي امریکايي عسکر بؤ برګدال په بدل کې د ګوانتانامو له زندنه خوشی شوي وو، اوس په قطر کې د طالبانو سیاسي دفتر سره یوځای شوو.
د طالبانو ویاند ذبیح الله مجاهد د اسوشیتیدپرس خبري اژانس ته ویلي چې دوئ به اوس د نورو هغو طالبانو سره یوځای شي چې په افغانستان کې د سولې دپاره مذاکرات کوي.
دا پنځه کسان په ۲۰۱۵ کال کې د یو جوړجاړي له مخې د ګوانتانامو له زندانه خوشی شوو. امریکايي عسکر برګدال چې د خپلې قرارګاه نه په خپل سر وتلی و او د ۲۰۰۹ کال راهیسې د طالبانو سره بندي و، تیرکال د یوې محکمې په حکم په ملامت ډول خوشی شو، خو د ورکیدو او اصولي سرغړونې له امله زر ډالره جریمه شو.
د طالبانو یو پخوانی دیپلومات حکیم مجاهد وایي، دا پنځه طالبان به چې یو پکې د اردو پخوانی رئیس هم دی، د سولې هڅې به ګړندۍ او مخکې یوسي.
افغانستان ته په خپل وروستي سفر کې د امریکا د بهرنیو چارو وزارت ځانګړي استازي زلمي خلیلزاد هم د سولې پر عالي شورا او طالبانو غږ کړی و چې د مذاکراتو ټیمونه لا پراخ کړي.
بلخوا د سولې د عالي شورا یو غړي محمد اسماعیل قاسمیار اسوشیتیدپرس ته ویلي چې واشنګټن باید له طالبانو سره یوازې د افغان دولت او طالبانو ترمنځ د سولې د مخامخ خبرو زمینه مساعده کړي، نه دا چې د امریکا د بهرنیو چارو وزارت ځانګړی استازی زلمی خلیلزاد د سولې د خبرو ټول مسولیت واخلي.
