د یو نوي اجرایي فرمان له مخې د شمالي کوریا او وینزویلا په ګډون، امریکا ته د اته هیوادونو پر اتباعو د راتګ بندیز وغزیدو. دا اجرایې فرمان د یکشنبې په ورځ د امریکا جمهور رئیس ډونالدټرمپ لاسلیک کړ. نوی فرمان په داسی وخت کې د اجرا وړ ګرځي چې دیته ورته په سفرونو د بندیز پخواني فرمان نیټه په پوره کیدو ده.
نوي أصول به د اکتوبر په اتلسمه عملي شي او متحدو ایالاتو ته د چاډ، ایران، لیبیا، شمالي کوریا، سومالیا، سوریې، وینزویلا او یمن اتباعو تګ به سخت اغیزمن کړي.
سپینې ماڼۍ د یکشنبې په ورځ (سیپتمبر۲۴) وویل چې د امریکا د کورني امنیت ادارې د جامع معیارونو یوه پروسه جوړه کړې چې د بهرنیو حکومتونو د معلوماتي مشارکت سیستم، پالیسیانې او قابلیتونه پکې مد نظر نیول شوي دي. د همدې لپاره د بهرنیوچارو وزارت د ټولو هیوادونو سره په مشوره کې دی چې دا معیارونه وارزوي ترڅو نیمګړتیاوی مشخصی شي او په سیستمونو کې يي پرمختګ رامنځ ته شي.
دا ځلي د نویو محدودیتونو دپاره کومه مشخصه نیټه نده ټاکل شوې، بلکې سپینه ماڼۍ وایي ترڅو چې مشخص شوي اته هیوادونه د افرادو د پیژندګلوی د هویت او شخصیت څیړنې دقیق سیستم نه وي فعاله کړې، امریکا به ورته ویزه ورنکړي.
یوه بیلګه يي د وینزویلا اتباعو ته د غیر مهاجرت ویزې بندیز دی چې وایي یوازی د حکومت مشخص مقامات او د هغوئ کورنۍ نشي کولی ویزه واخلي.
په پخواني فرمان کې د ایران، لیبیا، سومالیې، سوډان، سوریې او یمن اتباع شامل وو چې اکثریت مسلمان هیوادونه ګڼل کیږي. خو په نوي فرمان کې د سوډان نوم لری کړل شوی دی.
د نوي فرمان له مخې هغه کسان به ستونزه ونلري چې د امریکا د دایمې استوګنې جواز /ګرین کارډ ولري او یا هغه کسان چې برحاله ویزه ولري. سره لدې چې د عراق نوم یي په لست کې ندی شامل کړې، خو د رویترز د راپور له مخې امریکا ته راتلونکي عراقیان به تر سختې څیړنې وروسته امریکا ته دننه شي.
ددی فرمان د توجیح کولو دپاره امریکايي مقامات وایي ځینو حکومتونو د امریکا په غوښتنه د بایومیتریک/ د ګوتو د نښو پورې د شخص هویت پیژندنه اوسابقه څیړي چې تروریستي او جنایي سوابق ونلري، خو مشخص شویو اته هیوادونو دا سیستم تراوسه ندی فعاله کړې.
ددی فرمان سره اوس د امریکا ستره محکمه د اکتوبر لسمې نیټې ته تیاری نیسي چې د ښاغلي ټرمپ د تیر فرمان او دا چې آیا د مسلمانانو سره خو به تبعیض نه وی شوی، استدلال واوري.
د هوایي ایالت لوی څارنوال دوګلاس چن په تویتر ولیکل چې د ټرمپ د حکومت په وروستي فرمان جدي غور کوي.
د امریکا د إسلامي اړیکو شورا چې په امریکا د مدني حقونو ترټولو لوی سازمان دی، وایي په مسلمانانو د بندیز وروستی فرمان د ټرمپ د هغه زشت نژادي برترۍ اجنډا برخه ده چې تیرکال يي هم صادر کړې و.
خو جمهور رئیس ټرمپ د یکشنبې په ورځ د نیوجرسي نه واشنګټن ته د ستنیدو په وخت کې خپل دلیل څرګند کړ "د سفر بندیز... چې څومره قوي وي، هغومره ښه دی."
