د جمهور رئیس ټرمپ او کانگرس موافقه وکړه چې د دریو اونیو لپاره د امریکا د فدرالي حکومت تړل شوې ادارې بیرته پرانیستل شي.
جمهور رئیس ټرمپ نن د جمعې ورځ په یو خبري کنفرانس کې د فدرال حکومت له کارکوونکو مننه وکړه چې د حکومت د یو شمیر ادارو د تړل کیدو سره سره یې کار کړی دی.
ښاغلي ټرمپ په خپلو خبرو کې یو ځل بیا د مکسیکو سره په پوله د سرحدي دیوال په جوړولو باندې په ټینگار سره وویل د اسرائیل په شان نورو هیوادونو پر خپل سرحد باندې په دیوال کولو سره خپلو هیوادونو ته د ترهگرو د تللو مخه نیولې ده.
د کانگرس د مشرانو او د جهور رئیس ټرمپ موافقې له مخې ټاکل شوې چې د هغې بودجې پر سر خبرې وروسته وشي چې ښاغلی ټرمپ یې د مکسیکو سره د امریکا په پوله د دیوال د جوړولو لپاره غواړي.
د رویترز اژانس رپوټ ورکړی چې ددې موافقې پر اساس به د امریکا فدرال حکومت هغه بودجه ترلاسه کړي چې د سرحدي امنیت چارې په کې شاملې دي. خو دا بودجه به په مشخصه توگه د سرحدي دیوال لپاره نه وي.
په تیرو پنځه اونیو کې د امریکا د فدرالي حکومت د یو شمیر ادارو د بندیدو په نتیجه کې د فدرالي ادارو شاوخوا ٨٠٠ زره مامورین له معاش بې برخې وو.
دا د امریکا په تاریخ کې د فدرالي حکومت د تړل کیدو تر ټولو اوږده موده ده.