ترکي چارواکي وایي چې رجب طب اردوغان به نن چهارشنبه (نومبر۱۳) واشنګټن ته رسیږي او له ولسشمر دونالډ ټرمپ او نورو امریکايي چارواکو سره به وویني.
دواړه مشران به د سوریې په شمال کې د کردانو پر ضد د ترکيې د پوځي عملیاتو، د ترکیې له لوري له روسیې څخه د اس-۴۰۰ میزایلو د اخیستلو او د واشنګټن-انقره ترمنځ د امریکا اف-۳۵ جنګي الوتکو د قرارداد په اړه خبرې او بحث وکړي.
واشنګټن او د ناټو متحدینو یې اندېښه ښودلې ده چې ولې ترکیې له روسيې څخه اس-۴۰۰ میزایل پلورلي.
امریکا وايي چې د روسیې د اس-۴۰۰ میزایلو دفاعي سیستم د امریکا اف-۳۵ جنګي جټ الوتکو ته ګواښ پېښوي. امریکا د اوس لپاره له ترکیې سره د دغو الوتکو د پلورلو قرارداد ځنډولی دی.
یو لوړ پوړي امریکایي چارواکي ویلي دي چې د روسي میزایلو د پلورلو مسئله به د دواړو ولسمشرانو ترمنځ د بحث اصلي موضوع وي.
په همدې حال کې د ولسمشر اردوغان ویاند فهرتین التون په خپل ټویټر کې لیکلي دي چې له روسیې څخه د اس-۴۰۰ میزایلو د پېرودلو په اړه د ترکیې دریځ څرګند دی.
نوموړي ویلي دي چې ترکیې دغو میزایلو ته عاجل ضرورت درلود. ښاغلي التون ویلي دي چې متحده ایالتونه باید د دواړو هېوادونو په اړیکو کې دا مسئله په یوې ستونزې بدله نه کړي.