د امریکا د کالیفورنیا په ایالت کې د هیلري استوايي طوفان او سختو اورښتونو له امله سړکونه، ښوونځي او هټۍ تړل شوي دي.
د کالیفورنیا والي، ګاوین نیوسام په دغه ایالت کې بېړنی حالت اعلان کړی دی.
د دغه ایالت په لاس انجلس ښار کې د هوا پېژندنې د ملي ادارې استازي تېره شپه وویل، چې په بېلابېلو برخو کې د سختو اورښتونو نوي ریکارډونه ثبت شوي دي.
په ورته وخت کې، د ریشتر په کچه ۵.۱ درجې یوې زلزلې سویلي کالیفورنیا ولړزوله، خو د مرګ ژوبلې او زیانونو په اړه سمدستي راپور نه دی ورکړل شوی.
ټاکل شوې وه چې د دوشنبې په ورځ د اګست ۲۱مه (زمري ۳۰مه) د کالیفورنیا په سن ډیاګو، لاس انجلس، پاسادینا او پامډیل کې نوی تعلیمي کال پیل شوې وای، خو د سختو اورښتونو له امله تر سبا پورې وځنډول شو.
د هیلري طوفان چټک والی چې د کټګورۍ په اساس په څلورمه درجه کې دی، د مکسیکو څخه متحدو ایالتونو ته په تیریدو سره، ورو شوی دی.
اوس مهال د دغه طوفان مرکز په نواډا ایالت کې دی او اټکل کیږي چې ډېر ژر به له هغه ځایه تېر شي او د اوریګون او ایډاهو ایالتونو ته ورسیږي.
د امریکا د سمندري طوفانونو د څار ملي مرکز ویلي دي چې د دغه هېواد په سویل لویدیځو برخو کې هم د سیلابونو د راوتلو اټکل شوی دی.
د امریکا په سویل لویدیځ کې شاوخوا ۲۶ میلیونه خلک په داسې سیمو کې ژوند کوي چې د سیلاب له خطر سره مخامخ دي.
د هیلري طوفان اوس مهال په ساعت کې د ۵۵ کیلومترو په سرعت د دوامداره بادونو سره حرکت کوي.
د هوا پیژندني څانګې یو کارپوه، جیف مسټرز وویل چې دغه سیمه په پیړۍ کې یو ځل دا ډول اورښتونو تجربه کوي او شونې ده چې د نیواډا ایالت کې به د اورښت نوی ریکارډ ثبت شي.