په جاپان کې د ډونټ روباټیکس په نامه د ټکنالوژۍ یوې کمپنۍ د لومړي ځل لپاره داسې یو ماسک جوړ کړی چې کاروونکي ته د ټولنیز واټن د مراعت کولو تر څنګ د نورو ژبو په ژباړې کې هم مرسته کوي.
دغه ماسک چې (C-Face) نومیږي د موبایل د یو اپلیکیشن د لارې د کاروونکي خبرې ځیرک تیلیفون ته لیږدوي او پداسې حال کې د خلکو تر منځ د افهام او تفهیم شرایط برابروي چې تر منځ یې د لسو مترو فاصله هم مراعت شي.
د ماسک جوړونکي وایي دغه ماسک چې ډیر کم وزن لري، په ځانګړي ډول د ډاکټرانو لپاره ګټور دی ځکه هغوي غواړي د خپلو مریضانو سره د ټولنیز واټن په مراعت کولو د نږدې نه وګوري.
دغه ځیرک ماسک کولی شي جاپاني ژبه انګلیسي، کوریایي او نورو ژبو ته وژباړي.
د ماسک جوړونکي وایي دا ماسک حتی د کرونا ویروس د خپریدو د مخنیوي په خاطر د بندیزونو د لیرې کیدو نه وروسته هم ګټور ثابتیدی شي.
ټاکل شوې چې دا ماسک د بل کال د فبروري په میاشت کې د پلور لپاره بازار ته وړاندې شوي او د یو ماسک بیه به ۴ زره جاپاني ین یا ۴۰ امریکایي ډالره وي.
د ډونټ روباټیکس کمپنۍ د دې ځیرک ماسک د جوړولو لپاره تقریباً ۱۰۰ ملیونه جاپاني ین بسپنه راټوله کړې وه. دا کمپنۍ وایي د ماسک د جوړولو هدف یې دا دی چې د کرونا وبا پر مهال د خلکو ژوند آسان کړي.