په امریکا کې منصفه هیت هغه سپین پوستی امریکایي پولیس ډیریک شاووین مجرم وباله چې یو تور پوستی امریکایي جورج فلویډ یې وژلی و.
په امریکا او نړۍ کې د منصفه هیت د پریکړې په هکله بیلا بیل غبرګونونه راغلي.
د امریکا جمهور رئیس جو بایډن او مرستیالې یې کاملا هریس پرون د سه شنبې په ورځ د منصفه هیت د پریکړې نه وروسته ملت ته وینا وکړله.
ښاغلي بایډن خپلو خبرو کې وویل، " نن مو آرامه ساه واخیسته، د انصاف یو اقدام د انصاف سره برابر ندی او باید سیستم اصلاح کړو. "
جمهور رئیس بایډن د جورج فلویډ د کورنۍ سره په ټیلیفون کې خبرې کړي او په امریکا کې نژادي تبعیض یې د "ملت په روح داغ" بللی دی.
بایډن وویل، " نننۍ پریکړه د مخکې تګ لپاره یو ګام دی خو دا ډیر لږ دی. او د عدالت لپاره ستر ګام کیدلی شي."
خو بل پلو بیا د سنا په مجلس کې د ټکساز د ایالت جمهوري غوښتونکي سناتور، جان کورنیا د جمهور رئیس بایډن په څرګندونو اعتراض کړي.
سناتور کورنیان په ټویټر کې لیکلي، "د منصفه هیت دا پریکړه په یوې قضیې کې د فردي حقایقو پر بنسټ د یوه افسر پر ضد و. زه یې منم خو دیته اړتیا نشته چې په عمومي توګه د قانون د تطبیق د ادارو نوم بد شي."
په همدې حال کې د برتانیې صدراعظم بوریس جانسن د جورج فلویډ په قضیې کې د منصفه هیت په پریکړې خوښي ښودلې. ښاغلي جانسن په ټویټر کې لیکلي، " د جورج فلویډ په مړینې خواشینی وم او د دې پریکړې هرکلی کوم. د جورج فلویډ د کورنۍ او ملګرو سره خواخوږي ښیم. "
منصفه هیت ټول ۱۲ تنه وو چې شپږ یې سپین پوستي او پاتې یې تور پوستي یا هغوي څو نژاده امریکایان وو. دوي د ۱۰ ساعتونو لپاره په هغو معلوماتو بحث وکړ چې د محاکمې د درې اونیو په جریان کې راټول شوي وو.
د پولیسو په افسر ډیریک شاووین درې تورونه وو او منصفه هیت په درې واړونو تورونو کې هغه مجرم وباله.