پداسې حال کې چې ټاکل شوې د متحده ایالاتو جمهور رئیس جو بایډن بله میاشت منځني ختیځ ته د خپل رسمي سفر په لړ کې سعودي عربستان ته ولاړ شي خو لا معلومه نده چې آیا ددې هیواد د ولیعهد محمد بن سلمان سره به دوه په دوه وګوري که نه.
ښاغلي بایډن جمعه جون ۱۷ (غبرګولي۲۷) په خبري کنفرانس کې د بن سلمان سره ممکنه ملاقات کم اهمیته وباله. د یوې پوښتنې په ځواب کې چې آیا سعودي ته د سفر پر مهال به د محمد بن سلمان سره وګوري که نه، جمهور رئیس جو بایډن وویل، "زه یوې نړیوالې غونډې ته ځم او هغه (محمد بن سلمان) به هلته وي، زه به د هغه سره ونه ګورم".
ټاکل شوې چې جمهور رئیس بایډن په سعودي عربستان کې د جولای د میاشتې په نیمایي کې د خلیج همکارۍ د مشرانو په غونډې کې برخه واخلي. سپینې ماڼۍ ویلي چې ښاغلی بایډن به د سعودي د رسمي مشر باچا سلمان او د هغه د ټیم سره وګوري چې ولیعهد محمد بن سلمان هم پکې شامل دی.
پخپله جمهور رئیس بایډن څه موده وړاندې ویلي و چې د واشنګټن پوسټ خبریال جمال خاشقجي د قتل له کبله سعودي عربستان "پردی" شوی خو پدې سفر کې به ښاغلی بایډن کوښښ وکړي سعودي عربستان وهڅوي چې د تیلو تولیدات پدې هیله ډیر کړي چې په متحده ایالاتو د تیلو بیې کمې شي.
سپینې ماڼۍ هم ویلي چې سعودي عربستان ته د جمهور رئیس بایډن د سفر تمرکز به د محمد بن سلمان سره لیده کاته نه وي.
د سپینې ماڼۍ ویاندې کارین ژان پې یر هم ویلي چې جمهور رئیس به د لسو څخه د ډیرو مشرانو سره وګوري او دا تمه هم شته چې د سعودي ولیعهد به هم وګوري.
د امریکا استخبارات د جمال خاشقجي په قتل کې محمد بن سلمان ګرم بولي. خاشقجي په سعودي عربستان کې زیږدلی و او په امریکا کې د دایمي اوسیدو اسناد یې درلودل.
هغه په ۲۰۱۸ کال کې په ترکیې کې د سعودي عربستان په قونسلګرۍ کې ووژل شو او مړی یې ټوټې ټوټې شو.