پاکستان د جمعې په ورځ مۍ ۱۰ (غوايي ۲۱) له ایرلنډ سره د درې شل اوریزو لوبو د لړۍ لومړنۍ لوبه د پنځو ویکټو په توپیر وبایلله.
د ایرلنډ په پایتخت ډبلین کې د پچې له بایللو وروسته پاکستان کوربه ټیم ته د شپږو ویکټو په بایللو په ټاکل شویو ۲۰ اورونو کې د ۱۸۳ منډو هدف وټاکه.
ایرلنډ دغه هدف د پنځو لوبغاړو په بایللو سره په ۱۹.۵ اورونو کې پوره کړ او لوبه یې وګټله.
د پاکستان پرانیستونکی توپ وهونکی محمد رضوان د یوې منډې کولو وروسته وسوځېد او کپتان بابر اعظم ترټولو زیاتې ۵۷ منډې وکړې.
د ایرلنډ دپاره انډریو بالبرني ترټولو زیاتې ۷۷ منډې وکړې او د شاهین افریدي په توپ وسوځېد.
د پاکستان توپ اچوونکو نسیم شاه او عماد وسیم هم یو یو لوبغاړی وسوځاوه او عباس افریدي دوه لوبغاړي وسوځول.
د ایرلنډ او پاکستان ترمنځ بله لوبه د یکشنبې په ورځ او وروستۍ لوبه د سه شنبې په ورځ (مۍ ۱۴) ده.
ټاکل شوې ده چې د جون په میاشت کې په نړیوال جام کې له ګډون وړاندې، پاکستان د روانې میاشتې په پای کې په انګلنډ کې د هغه هېواد له ټیم سره څلور ۲۰ اوریزې لوبې ترسره کړي.
پاکستان تراوسه نړیوال جام ته خپله لوبډله نده اعلان کړې او تمه کیږي چې له انګلنډ سره د لوبو پر مهال یې اعلان کړي.