د هند د غوره لیګ (آی پي ایل) په سیالیو کې سنرایزرز حیدرآباد لوبډلې ډیوډ ورارنر له کپتانۍ څخه لېرې کړ او پر ځای یې کین ویلیمسن وټاکه.
د لوبډلې په رسمي اعلامیه کې راغلي چې "سر د سبا مۍ دویمه (غوايي۱۲) نه د لوبو تر پایه کین ویلیمسن د ډیوډ وارنر پر ځای د لوبډلې کپتان وي. "
په اعلامیې کې د کپتان د بدلولو د دلیل په هکله څه ندي ویل شوي خو دا پکې راغلي چې د سنرایزرز حیدرآباد لوبډله پلان لري د سیالیو په پاتې لوبو کې د بهرنیو لوبغاړو ترکیب بدل کاندي.
سنرایزرز همدارنګه ویلي چې اسټرالیایي لوبغاړي ډیوډ وارنر د څو کالونو راهیسې د لوبډلې لپاره ډیر اغېزناک لوبغاړی و او په پاتې لوبو کې به "د لوبو په ډګر کې دننه او بهر د لوبډلې د کامیابۍ لپاره هلې ځلې کوي."
د سنرایزرز حیدرآباد لوبډلې د هند د غوره لیګ یا آی پي ایل په روانو سیالیو کې د کپتان ډیوډ وارنر تر مشرۍ لاندې شپږ لوبې کړي او یوازې یوه یې ګټلې ده.
دا لوبډله اوسمهال د نمرو په جدول کې آخري مقام لري.
پدې لوبډله کې درې افغان لوبغاړي، محمد نبي، راشد خان او مجیب الرحمان هم لوبه کوي.