د پاکستان کرکټ بورډ وايي د هند د تلویزوني خپرونو یوې کمپنۍ ورته خبر ورکړی دی چې د پاکستان د سوپرلیګ لوبې نورې نه خپروي.
د آی ام جي-ریلاینس (IMG-Reliance) شرکت د یکشنبې په ورځ د پاکستان کرکټ بورډ ته خبر ورکړ چې له دې وروسته به د هغه هېواد د سوپر لیګ سیالۍ پر تلویزنونو نه خپروي.
دا شرکت د پاکستان د سوپر لیګ لوبو د خپرولو درې کلن قرارداد لاسلیک کړی و. ځینې نورو هندي سپورټي چاینلونو هم ویلي دي چې دا لوبې نه خپروي.
دا ګام څو ورځې مخکې د هند تر ولکې لاندې کشمیر کې د پلوامه په سیمه کې پر هندي و له برید وروسته اخیستل کیږي.
په دغه برید کې شاوخوا ۴۴ هند نیمه پوځي سرتېري ووژل شول او لسګونه نور ژوبل شول. د پاکستان کرکټ بورډ په دې اړه خواشینې ښودلې ده.
دا برید په هند کې دننه پراخ غبرګونونه پارولی دي. له دغه برید وروست د دواړو هېوادونو ترمنځ اړیکې بیا هم پیچلې شوي دي. د پاکستان کرکټ بورډ وايي هڅه کوي چې کوم بل شرکت پیدا کړي چې دا لوبې یې هلته خپرې کړي.
اسوشیتد پرس وايي چې په پاکستان کې مېشتې د جیش محمد ډلې رسنیو ته په استول شوې پيغام کې ویلي دي چې په دغه برید کې د دوی لاس دی.
د پاکستان سوپر لیګ څو ورځې مخکې پيل شو چې د پاکستان لوبغاړو په ګډون په لسګونه بهرني لوبغاړي لوبیږي. د هند او افغانستان لوبغاړي په دغه لیګ کې نه لوبیږي.