د امریکا د فلوریډا په ایالت کې خلک د یو لوی راتلونکي طوفان څخه د ژغورنې لپاره چمتوالی نیسي.
د هوا پېژندنې د ادارو د اټکل په اساس، دا طوفان به د چهارشنبې په ورځ دغه ایالت ته رسېږي چې ممکن بارانونه هم ورسره مله وي.
د «ایدالیا» په نوم سمندري طوفان د سه شنبې په ورځ په یو لوی زورور طوفان بدل شوی او په امریکا کې د طوفان ملي مرکز وايي چې د ورځې په اوږدو کې به نور هم تېز کېږي.
د فلورېډا ایالت د تامپا په ښار او خلیج ساحل کې د طوفان خبرداری خپور شوی دی.
د فلورېډا والي ران ډیسانتیس خبرداری ورکړی چې دا طوفان به «لوی اغیز» ولري او د دغه ایالت په ۴۶ ولسوالیو کې یې اضطراري حالت اعلان کړی دی.
چارواکو په ۲۱ ولسوالیو کې خلک هڅولي دي چې د طوفان تر رسېدو مخکې ځانونه خوندي سیمو ته وباسي.
ولسمشر جوبایډن د دوشنبې په ورځ له والي ډیسانتیس سره په تیلیفون کې خبرې وکړې او په دغه ایالت کې یې د اضطراري حالت اعلان تائید کړ.
په فلورېډا کې د ملي ګارډ ۱۱۰۰ غړي چمتو کړل شوي چې د ضرورت په وخت کې د ژغورنې په چارو کې مرسته وکړي.
د کیوبا په لویدیځ کې د «ایدالیا» طوفان له کبله سخت بارانونه او سیلابونه راووتل.