افغانستان په دویمې شل اوریزې لوبې کې ایرلنډ ته په ماتې ورکولو په نړیواله کچه نړیوال ریکارډ جوړ کړ.
افغانستان لومړنی هېواد شو چې د ۲۰ اورونو په سیالیو کې په مسلسل ډول لس لوبې ګټې. په دغو لسو بریاو کې څلور وارې ایرلنډ ته ماتې ورکړې ده.
تر دې مخکې انګلنډ و چې اته مسلسلې شل اوریزې سیالۍ یې ګټلې وې.
افغانستا په دویمه لوبه کې پچه وګټله او ایرلنډ ته یې د ۱۸۴ منډو هدف ورکړ. وروسته باران وشو او ایرلنډ ته منډې او اوروونه دواړه کم شول. په ۱۱ اورونو کې ۱۱۱ منډې ورته په کار کې وې، خو پوره یې نشوه کړې.
راشد په څلورو اورونو کې د ایرلنډ پنځه لوبغاړي وسوځول او درې منډې یې ورکړې. د لوبې غوره لوبغاړي راشد خان او نجیب ترکي شول. د ډېرو څلوریزو او شپږیزو جایزې هم نجیب ته ورکړل شوې.
کپټان اصغر ستانکزي نننۍ بریا د کابل د وروستي برید د قربانیانو په نوم کړه او دوعا یې وکړه چې افغانان دې په آینده کې له دا ډول غمونو په امان وي.
په افغان توپ وهونکو کې نجیب ترکي ۹۰ منډې وکړې او نبي په ۱۵ توپونو ۳۴ تېزې منډې وکړې. د دغې لوبې په بري سره افغانستان له ایرلنډ سره د ۲۰ اورونو د دریو لوبو سیریز هم وګاټه.
د افغانستان او ایرلنډ ترمنځ وروستۍ درېیمه شل اوریزه لوبه د یکشنبې په ورځ ده.