د افغانستان د کرکټ ملي لوبډلې دوشنبه مارچ ۱۸ (کب ۲۸) د آیرلینډ لوبډلې ته په دریمې لوبې کې هم ماتې ورکړله او پدې سره یې د دریو شلو اوریزو لړۍ ۲ـ۱ وګټله.
افغان لوبډلې سیالې لوبډلې ته په دریمې لوبې کې د ۵۷ منډو په توپیر ماتې ورکړه.
افغانستان او آیرلینډ چې دواړو یې په یو وخت د کرکټ نړیوالې شورا بشپړ غړیتوب تر لاسه کړی، دا شپږم ځل دی چې د شل اوریزو لوبو لړۍ کوي چې پنځه یې افغانستان او یوازې یوه یې آیرلینډ ګټلې.
د دوشنبې په لوبې کې افغانستان آیرلینډ ته د ګټلو لپاره د ۱۵۵ منډو هدف ورکړی و خو د آیرلینډ ټول لوبغاړي د لوبې په ۱۸م اور کې وسوځیدل او یوازې ۹۸ منډې یې وکړلې.
د افغانستان لپاره تر ټولو ډیرې منډې ابراهیم ځدراڼ وکړلې. ځدراڼ په ۵۱ توپونو ۷۲ منډې وکړلې او د لوبې تر پایه ونه سوځید او د لوبې غوره لوبغاړي جایزه یې هم وګټله.
د دویمې لوبې برعکس دا ځل د افغانستان تیزو توپو اچوونکو وکړی شو چې د سیالې لوبډلې ډیر لوبغاړي وسوځوي.
عظمت الله عمرزي څلور، نوین الحق درې، فضل الحق فاروقي، راشد خان او ننیګالي خروټي یو یو لوبغاړی وسوځاوه.
د لوبې وروسته نوین الحق په لنډې مرکې کې وویل چې دا سیالۍ د را روان شل اوریز نړیوال جام لپاره د چمتوالي یو ښه فرصت و.
د دې لړۍ د غوره لوبغاړي جایزه بیا د افغانستان د شل اوریزو لوبو کپتان راشد خان ته ورکړل شوه چې په توپ اچونې او توپ وهنې کې یې ښه کارکردګي کړې وه.
راشد د ملا عملیاتو له کبله تقریباً څلور میاشتې کیدې چې د افغانستان لپاره یې لوبې نه وې کړي او دا یې تر جوړیدو وروسته د لوبو لومړۍ لړۍ وه.
راشد په لنډې مرکې کې وویل چې پدې لړۍ کې د ځوانو لوبغاړو ځلیدو څخه څرګندیږي چې د کرکت په ډګر کې د افغانستان راتلونکې روښانه ده.