په استرالیا کې د کرکټ د نړیوال شل اوریز جام د سیالیو په ترڅ کې نن شنبه اکتوبر ۲۲ (تله ۳۰) انګلنډ افغانستان او نیوزلنډ کوربه هېواد استرالیا ته ماتې ورکړې.
د استرالیا د پرت په ښار کې انګلنډ د پچې له ګټلو وروسته افغانستان ته د منډو کولو بلنه ورکړه.
افغانستان په ۱۹.۴ اورونو کې د ټولو لوبغاړو په سوځېدو سره انګلنډ ته د ۱۱۳ منډو اسان هدف وټاکه.
په افغان توپ وهونکو کې تر ټولو ډېرې منډې ۳۳ عثمان غني او ۳۰ ابراهیم ځدراڼ وکړې.
انګلنډ دا هدف د پنځو لوبغاړو په سوځېدو سره په ۱۹م اور کې پوره او خپله لومړۍ لوبه یې وګټله. د انګلنډ سم کوران د افغانستان پنځه لوبغاړي وسوځول او د لوبې غوره لوبغاړی شو.
د نن ورځې په بلې لوبې کې نیوزلنډ بیا کوربه هېواد استرالیا ته لویه ماتې ورکړه.
د استرالیا د سډني په ښار کې نیوزلنډ کوربه هېواد ته د ۲۰۰ منډو لوی هدف وټاکه او د استرالیا ټوله لوبډله یې ۱۷.۱ اور کې وسوځوله.
نیوزلنډ او استرالیا د افغانستان سره په یو ګروپ کې دي. د نیوزلنډ ډیون کانوای د لوبې غوره لوبغاړی شو. ده په ۵۸ توپونو باندې ۹۲ چټکې منډې وکړې.
د افغانستان بله لوبه د چهارشنبې په ورځ په میلبورن کې له نیوزلنډ سره ده.