د امریکا د بهرنیو چارو وزارت له طالبانو څخه غوښتي دي چې د افغانستان له حکومت سره د سولې خبرې وکړي.
د بهرنیو چارو وزارت ویاندې، هیدر نیورت د سه شنبې په ورځ [فبرورۍ ۲۷] په واشنګټن ډي سي کې خبریالانو ته ویلي دي چې د سولې هر ډول خبرې باید "د افغانانو په مشرۍ او د افغانانو په مالکیت وي."
امریکايي دیپلوماتان فکر کوي چې اوس طالبان د سولې لپاره چمتو نه دي.
میرمن هیدر نیورت ټینګار کوي چې په افغانستان کې د شخړو د ختمولو لپاره "پوځي حل لاره نه ویني."
د افغانستان ولسمشر محمد اشرف غني د کابل پروسې په دویم کنفرانس کې له طالبانو سره د روغې جوړې لپاره د یوه سیاسي چوکاټ د جوړېدو وړاندیز وکړ، ویې ویل چې د طالبانو ډله دې د اوربند تر اعلانولو وروسته، د "یوه سیاسي ګوند" په صفت وپيژندل شي.
ولسمشر غني طالبانو ته وویل چې حکومت یې بې له کوم قید او شرطه خبرو ته چمتو دی.
پاکستان کې "مثبتې نښې نښانې"
د امریکا د ولسمشر ډونالډ ټرمپ لخوا پر اسلام آباد د پوځي مرستو له ځنډېدو وروسته، یوه جګپوري امريکايي جنرال په پاکستان کې د بدلون "مثبتې نښې نښانې" لیدلي دي.
د امریکا د پوځ د مرکزي قوماندې مشر، جنرال جوزف وتل د سه شنبې په ورځ د کانګرس له غړو سره په یوې غونډې کې ویلي چې د جنوبي آسیا او افغانستان لپاره د امریکا د تګلارې او په سیمې او افغانستان کې د امن د راوستلو لپاره د پاکستان همکاري اړینه ده.
د امریکا په شمول، د افغانستان او طالبانو ترمنځ د سولې په خبرو کې یو مهم اړخ پاکستان یادیږي چې د افغان او امریکایي چارواکو په وینا طالبانو ته یې په خپلې خاورې کې ځای ورکړی دی.
په افغانستان کې د سولې لپاره، امریکايي چارواکو له طالبانو څخه غوښتي دي چې له افغان حکومت سره مذاکرات وکړي.
واشنګټن ټینګار کوي چې له طالبانو سره د سولې طرف، افغانستان دی، نه امریکا.
Your browser doesn’t support HTML5
امریکا: له طالبانو سره د سولې طرف کابل دی، نه واشنګټن