منگل: کوم لوبغاړي چې ځلیږي د کرکټ ملي ټیم ته به راځي

د افغانستان د کرکټ د ملي ټیم د انتخاب د کمیټې مشر او د ملي ټیمپخوانی کپتان نوروز منگل وايي چې ټیم کې تغیرات هغه وخت پکار وي چې کله د ټیم کارکردگي ښه نه وي. د افغانستان د کرکټ اوسنی ملي ټیم په هر ډگر کې ځلیدلی دی. اسیا جام کې ېې بهترینه لوبه کړې او دا به درسته نه وي چې پرته له ضرورته پکې بدلون راشي.

د امریکا غږ اشنا راډیو سره ځانگړې مرکه کې ښاغلي نوروز منگل وویل چې هغه لوبغاړي چې تر دې دمه ملي ټیم کې ښه ځلیږي او د یو بل سره ېې ترکیب سم روان دی ،هم هغوي به راتلونکو لوبو کې لوبیږي. یوازینۍ تغیر به د لوبو د محیط او مقابل ټیم په اساس کیږي.

هغه وویل چې د افغانستان پریمیر لیگ کې یو شمیر ځوان لوبغاړو خپله وړتیا وښودله او دوي به راتلونکې کې د هغوي د استعداد نه پوره گټه اخلي او د الف او ایمرجنگ سیالیو کې به لوبیږي. د تیز توپ اچونکو په اړه هغه وویل چې سید شیرزاد نوین الحق او ضیاالرحن شریفي د افغانستان راتلونکي ستوري دي. توپ وهنه کې حضرت ځاځی، درویش رسولی. شاهد کمال او رحمن الله گربز ښه اینده لري. د قیس او وقار غوندې ښه سپین بالران هم راغلي.

هغه وویل چې د دومره تکړه او ځوان لوبغاړو په شتون کې ورته د انتخاب کار سخت شویدی. خو بیا هم هغه لوبغاړي که هغه مشران وي اوکه ځوانان ،چې په میدان کې ښه ځلیږي، فرصت به هم هغو ته ورکول کیږي.

د افغانستان دکرکټ د ملي ټیم د انتخاب د کمیټې مشر نوروز منگل سره مرکه