د افغانستان کرکټ بورډ وايي چې د ۱۹ کلنو لوبډلې ورو توپ اچونکی مجیب الرحمن ځدراڼ د بنګلدېش په تجارتي سیالیو کې لوبیږي.
هغه بنګلدېش ته روان شوی او د محمد نبي او راشد خان په لوبډلې ویکټورینز کې به وي، خو لا یې د قرارداد په اړه ډېر جزییات نه دي ورکړل شوي.
محمد نبي او راشد خان په همدغې میاشت کې له اماراتو سره د افغانستان د څلور ورځنیو سیالیو لپاره د بنګلدېش سیالۍ پرېږدي. محمد نبي کابل ته راغلی او ټاکل شوې چې راشد خان هم ژر راستون شي.
مجیب الرحمن د اسیا د ۱۹ کلنو ځوانانو په سیالیو کې د لوبې غوره لوبغاړی شو، هغه ۲۰ ویکټې واخیستي او توپ اچونه یې ډېره وستایل شوه. هغه له پاکستان سره په پایلوبې کې پنځه لوبغاړي وسوځول.
هغه په ښي لاس ورو توپ اچوي چې د ۱۹ کلنو د مخکني روزونکي دولت احمدزي په وینا څلور پنځه رقمه سپېن بال کوي او منډه جوړوونکو ته لوی سرخوږی جوړوي.
د بنګلدېش پریمیر لیګ هرکال کیږي او د نړۍ مشهور لوبغاړي په کې لوبیږي. له شک پرته چې په دا ډول سیالیو کې د مجیب ځدراڼ لوبېدل به د هغې تجربې لا پخې او زیاتې کړي.
د بنګلدېش کورنیو سیالیو په تېرو پړاونو کې محمد نبي، راشد خان او سمیع الله شینواري لوبه کړې وه، خو نجیب ځدراڼ، مجیب ځدراڼ او ظاهر خان په کې په اول ځل برخه اخلي.