د افغانستان کرکټ بورډ وايي چې په هند کې به له بنګلدېش سره د ۲۰ اورونو درې نړیوالې لوبې کوي.
دا لوبې د هند په دهرادون کې د جون د میاشتې په درېیمه، پنځمه او اوومه کیږي چې کوربه یې افغانستان دی.
د کرکټ بورډ اعلامیې د بورډ د مشر عاطف مشعل له خولې لیکلي دي:" د افغانستان کرکټ بورډ خوښ دی چی د بنګله دیش په څیر د پیاوړې لوبډلې کوربتوب کوي. افغانستان بهله بشپړ چمتووالي سره د بنګله دیش پر وړاندې د لوبو ډګر ته ووځي."
افغانستان لا دغو سیالیو ته لوبډله اعلان کړې نه ده خو د بورډ اجرایي مشر شفیق ستانکزی وايي چې په هند کې په تمرینونو د بوختو لسګونو افغان لوبغاړو له منځه به دغو سیالیوته لوبغاړي غوره کیږي.
افغانستان څه موده مخکې د ملي، ۱۹ کلنو لوبډلې لوبغاړي هند ته د تمرین لپاره واستول. افغانستان د مهال د ۲۰ اورنو په نړیوالې درجه بندۍ کې اتم او بنګلدېش لسم مقام لري.
افغانستان او بنګلدېش یو وارې د ۲۰ اورونو لوبه کړې ده چې بنګلدېش ګټلې ده.
د افغانستان د ملي لوبډلې درې لوبغاړي راشد خان، محمد نبي او مجیب ځدراڼ همدا اوس د ای پي ال د ۲۰ اورونو په تجارتي سیالیو بوخت دي.
افغانستان د ۲۰ اورونو په لوبو کې نسبتآ پیاوړ لوبډله بلل کیږي.