د امریکا متحدو ایالتونو د دفاع وزیر او لوی درستیز وايي چې د امریکا او طالبانو ترمنځ هوکړې تر اوسه ښه او بدې پایلې درلودلې دي.
ښاغلي اسپر دا هم ویلي دي چې طالبانو تر ډیره د هوکړې موارد په پام کې نیولي دي.
د امریکا د دفاع وزیر مارک اسپر او د وسله والو ځواکونو لوی درستیز مارک میلی د چهارشنبې په ورځ (حوت ۱۴) په هلمند ولایت کې د امریکايي ځواکونو تر برید څو ساعته وروسته د کانګرس د استازو جرگې ته د امریکا-طالبانو د هوکړې په اړه معلومات ورکړل.
د چهارشنبې د ورځې برید د هوکړې تر لاس لیک څخه وروسته پر طالبانو باندې په افغانستان کې د میشتو امریکایي ځواکونو لومړنی برید دی چې د هلمند ولایت په نهر سراج ولسوالۍ کې وروسته له هغه وشو چې طالبانو د افغان ځواکونو پر پوستو برید وکړ.
د دفاع وزیر مارک اسپر سناتورانو ته وویل چې پر افغان ځواکونو له برید سره، طالبانو د تاوتریخوالي د کمولو په اړه شوې موافقه ماته کړه.
ښاغلی اسپر وايي: "ددغې ډلې (طالبانو) یو موټی ساتل ستونزمن کار دی، فکر کوم د هغوی په منځ کې سخت دریځه او انعطاف لرونکي موجود دي چې په خپل منځ کې هم شخړه لري."
تردې مخکې امریکايي چارواکو ویلي وو چې په هلمند ولایت کې پر طالبانو د هوايي برید پیغام دا دی چې په افغان ځواکونو د طالبانو د بریدونو زیاتیدل د منلو وړ نه دي.
ښاغلی اسپر د کانګرس استازو ته د شنبې په ورځ (فبرورۍ ۲۹) ګډ پریکړه لیک په اړه هم معلومات ورکړل چې د افغانستان ولسمشر محمد اشرف غني سره په ګډه صادر کړ.
د دفاع وزیر وايي: "دا هغه ژمنه ده چې ما د شنبې په ورځ له افغانانو سره وکړه، موږ له افغانانو دفاع کوو".
د امریکا او طالبانو ترمنځ د هوکړې له لاس لیک څخه وروسته، طالبانو رسنیو ته ویلي چې په بهرنیو ځواکونو بریدونه یې درولي دي، خو د تیر په څیر پر افغان ځواکونو به بریدونو ته دوام ورکړي.
