د متحده ایالاتو پوځ د شنبې په ورځ، فبروري ۲۲ (کب څلورمه) وویل د القاعده شبکې د سوریې څانګې حراس الدین ډلې یو لوړ پوړی غړی یې د دې هیواد په شمال لویدیځ کې په یو هوایي برید کې وژلی دی.
دا سږکال په سوریه کې د دې ډلې په وړاندې د امریکا د پوځ تازه برید دی. له دې وړاندې متحده ایالاتو او لویدیځو او عربي متحدینو یې ټینګار کړی و چې د ډسمبر په میاشت کې د پخواني ولسمشر بشارالاسد له نسکورېدو وروسته سوریه باید د "ترهګرو" ډلو لپاره په خوندي ځای بدل نشي.
د امریکا پوځ د جمعې په ورځ په یو بیان کې وویل چې د متحده ایالاتو د پوځ مرکزي قوماندانۍ (سینټکام) ځواکونو "د سوریې په شمال لویدیځ کې یو دقیق هوايي برید وکړ چې په کې د ترهګریز سازمان حراس الدین د رهبرۍ کچې یو لوړ پوړی تسهیل کوونکی وسیم تحسین بیرقدار ووژل شو".
د اسلامپاله یاغیانو لخوا د تېر عیسوي کال په ډسمبر کې د بشارالاسد د رژیم له نسکورېدو وړاندې د سوریې شمال لویدیځ د دې هېواد د تازه ولسمشر احمد الشرع د حیات تحریر الشام د اسلامي ډلې یو لوی مرکز و.
په برتانیې کې میشته د سوریې د بشري حقونو د څار ډله وايي چې بیرقدار پر یو موټر باندې د بې پیلوټه الوتکې په برید کې وژل شوی دی.
د متحده ایالاتو مرکزي قوماندانۍ تېره یکشنبه وویل چې د حراس الدین د ډلې "د مالي او لوژستیکي چارو یو لوړ پوړی چارواکی" یې وژلی دی.
همداشان د امریکا مرکزي قوماندانۍ تېره میاشت راپور ورکړ چې د حراس الدین یو بل لوړ پوړی غړی محمد صلاح الزبیر د سوریې په شمال لویدیځ کې په یو هوايي برید کې ووژل شو.
په امریکا کې میشته د SITE استخباراتي ډلې د معلوماتو په اساس حراس الدین د ۲۰۱۸ کال په فبروري کې تاسیس شوې خو دغې ډلې د جنوري په میاشت کې د خپل انحلال تر اعلان پورې له القاعده شبکې سره خپل تړاو تایید نه کړ.
حراس الدین چې په ۲۰۱۹ کې د متحده ایالاتو لخوا د یوې تروریستي ډلې په توګه وپېژندل شوه وروسته له هغې د خپل انحلال اعلان وکړ چې د سوریې نوي مشر احمد الشرع په دې هېواد کې د ټولو وسلهوالو ډلو د منحل کېدو فرمان صادر کړ.
فورم \ دبحث خونه