ټاکل شوې چې د متحده ایالاتو جمهور رئیس جو بایډن راتلونکې اوونۍ دریو اروپایي هیوادونو ته په رسمي سفر روان شي.
سپینې ماڼۍ یکشنبه جولای ۲ (چنګاښ۱۱) په یوې اعلامیې کې ویلي چې د ښاغلي بایډن د سفر لومړی تم ځای به لندن وي او هلته به درې ورځې تیرې کړي.
په اعلامیې کې ویل شوي چې جمهور رئیس به په لندن کې د پاچا چارلز او صدراعظم ریشي سوناک سره وګوري او د دواړو هیوادونو تر منځ به د نږدې همکارۍ په لا ښه قوي کېدو وغږیږي. د بریتانیا صدراعظم تیره میاشت په سپینې ماڼۍ کې د جمهور رئیس بایډن سره لیدلي وو.
دواړو مشرانو پدې ملاقات کې د "اتلانټیک په اعلامیې" د موافقې خبر ورکړ چې یو محدود اقتصادي شراکت او تمرکز یې د انرژي پر لیږد او نوې رامینځته کیدونکي تکنالوژۍ باندې دی. دوی دا مشارکت د خپلو هیوادونو د ملي امنیت لپاره خورا مهم وګاڼه.
بایډن وویل چې دا موافقه به د متحده ایالاتو او انګلستان سره مرسته وکړي چې "د چټکې بدلیدونکې نړۍ په لومړۍ لیکه کې پاتې شي."
د "اتلانټیک اعلامیې" اصلي ټکي د مهمو او نویو تکنالوژیو، اقتصادي امنیت، ډیجیټلي بدلون او پاکې انرژۍ ته د انتقال څخه د متحده ایالاتو او بریتانیا د مشرتابه تضمین دی.
تر لندن وروسته به د متحده ایالاتو جمهور رئیس د دوو ورځو لپاره لیتوانیا ته ځي چې د ناټو د غړیو هیوادونو د مشرانو په غونډې کې ګډون وکړي.
ټاکل شوې چې پدې غونډې کې د ناټو د ۳۱ غړیو هیوادنو مشران د اوکراین هغو ځوابي عملیاتو په وضعیت خبرې وکړي چې د روسیې څخه ددې هیواد د جنوبي برخو بیرته نیولو لپاره پیل شویدي.
د ناټو غړيو هیوادونو چې مشري یې متحده ایالات کوي، اوکراین ته د ملیاردو ډالرو په ارزښت مهمات او وسلې ورکړي خو لا هم د روسیې په هوایي بریدونو کې ګڼ شمیر اوکرایني عام خلک پداسې حال کې وژل کیږي چې د روسیې سلګونه توغول شوي توغندي شنډ شویدي.
تر لتوانیا وروسته به بایډن د ناټو نوي غړي شوي هیواد فنلنډ ته ځي او د دې ستر نظامي تړون سره د یو ځای کیدو د نمانځلو په مراسمو کې برخه اخلي. فنلنډ د همدې روان ۲۰۲۳ میلادي کال د اپریل په میاشت کې د ناټو غړی شو.
د فنلنډ تر څنګ سویډن هم غواړي چې د نړۍ د دې تر ټولو ستر نظامي تړون سره یو ځای شي خو ترکیه او هنګري چې دواړه یې د ناټو غړي دي تر دې دمه یې پدې تړون کې د سویډن یو ځای کیدو سره موافقه نده کړې.
اروپایي هیوادونو ته تر روانیدو وړاندې ټاکل شوې چې جمهور رئیس جو بایډن د همدې راتلونکې چهارشبنې په ورځ په سپینې ماڼۍ کې د سویډن د صدراعظم اولف کریسټرسن سره وګوري او د ناټو سره د یو ځای کیدو لپاره د دې هیواد په توقعاتو وغږیږي.
په اوکراین د روسیې د یرغل څخه درې میاشتې وروسته سویډن د ۲۰۲۲ کال د مې په میاشت کې د ناټو سره د یو ځای کیدو غوښتنه وکړله.
همدارنګه په پلان کې ده چې د ترکیې او سویډن جګپوړي دیپلوماتان په برسلز کې د ناټو په مقر کې د پنجشبنې په ورځ سره جرګه شي تر څو د ترکیې د اندیښنو په هکله ځوابونه وویل شي.
سره لدې چې د ترکیې جمهور رئیس رجب طیب اردوغان ناټو سره د فنلنډ یو ځای کیدو سره خپل مخالفت پای ته ورساوه خو هغه تیره اوونۍ یو ځل بیا سویډن وغانده چې یوې مظاهرې ته یې اجازه ورکړې وه چې د قرانکریم یوه برخه هم پکې وسوځول شوه.