د مِتحدو ایالاتو د جمهوري ریاست مرستیال مایک پنس په ملگرو ملتونو کې غړیو هېوداونو ته وویل پکارده د برما د پوځ د ناوړه چلند په وړاندې کلک دریځ غوره کړی شي.
د جمهوری ریاست مرستیال مایک پنس وویل: زه او ولسمشر ټرمپ د ملگریو ملتونو د امنیت پر شورا هم غږ کوو چې ډیر کوټلي او چټک گامونه واخلي، څو دا جنجال پایته ورسېږي او دروهینگیا خلکو ته دهغوی د اړتیا په وخت کې دامید او اسرې سبب شي.
هغه وویل متحد ایالات د برما پر امنیتي قواو یو ځل بیا غږ کوي چی دروهینگیا خلاف خپل تشدد پایته ورسوی او د اوږدې مودې د حل لپاره ددیپلوماتیکو هڅو ملاتړ وکړي.
یو رپوټ وايي د روهینگیا افراطیانو د سږکال د اگست په میاشت کې د برما پرا منیتی قواو برېیدونه وکړل او په نتیجه کې د برما قواو ډیر کلک انتقامي اقدامات وکړل. بشپړ کلي ېې وسوځول؛ ښځې اوماشومان ېې د تېښتې په حال کې ووژل.
په برما کې ددغی شخړې په اړه چې دیني رنگ هم ورکړل شوی دی، د معلوماتو راټولول ډیر گران کار دی.
د برما خبریاله نې ین نې ین وايي: که څوک هڅه وکړي چې د مسلمانانو د ټولنې غږونه خپاره کړي، یاله کوم راخیني سره مرکه وکړي، نوهغه ته د را خین د افراطیانو له خوانه په بد نظر کتل کېږي، گواښ هم ورته کیدلی شي. یوشمیر خلک غواړي رېښتیا ووايي، خو د گاونډیانو، پولیسو او جاسوسانو له خوانه څارل کېږي.
د برما مشرې انگ سان سوچي دسه شنبی په ورځ وویل چې هېواد ېې د روهینگیایانو د پېښو په اړه له نړۍ والو تحقیقاتو نه ویره نلري. هغی په خپله وینا کې ډاډ ورکړ چې د بشري حقونو نه د سرغړونو او همدارنگه به د ثبات د خرابولو له هڅو سره په ټینگه د عدالت پر بنسټ چلند وشي.
خو د فېل رابرتسن په څیردبشري حقونو غړي او ادارې د برما له مشرې سره توافق نلري.
دبشری حقونو د څار ادارې د اسیا څانگې رئیس فېل رابرتسن وايي: له ېوې خوانه حکومت جعلي عکسونه اوکیسی خپروي؛ خوله بلې خوانه زموږ په څېر د بشري حقونو پر ډلوبرید کوي. موږ ورته وايو موږ غواړو یوشمیر سیمو ته ولاړشو چې رېښتیا په خپله وگورو. اجازه راکړئ چې حقایق په خپله پېدا کړو.
د تیرې میاشتی په اوږدو کې تر څلورسوو زرو نه زیات روهینگیايان له خپل هېواد میانمار یابرما نه تېښتی او مهاجرت ته اړشول.
د روهینگیایانو ناورین چې د ځېنې نړۍ والو ادارو له خوانه قومي وژنه هم گڼل شوېده لا دوام لري.