د امریکا د متحدو ایالتونو پوځ نن یکشنبه ډسمبر ۳۱ (جدي۱۰) وویل چې څرخي الوتکو یې په سرې بحیرې کې د حوثي یاغیانو درې کښتۍ ډوبې کړې دي.
د امریکا د پوځ په اعلامیې کې ویل شوي چې په دغو کښتیو کې سپرو یاغیانو په یوې بلې اکمالاتي کښتۍ باندې برید کړی و.
اعلامیه وايي چې یاغیانو د امریکا د پوځ په څرخي الوتکو هم ډزې وکړې او په متقابلو ډزو کې د حوثي یاغیانو د څلورو کښتیو څخه یې درې، چې اکمالاتي کښتۍ ته نژدې وې، ډوبې شوې.
د امریکا پوځ وايي چې د حوثي یاغیانو یوه بله کښتۍ تښتېدلې ده.
د متحدو ایالتونو مرکزي قوماندانۍ ویلي دي یوې ډنمارکۍ کښتۍ، چې د سنګاپور تر بیرغ لاندې فعالیت کوي، د مرستې غوښتنه ترې وکړه.
حوثي یاغیانو په تېرو ۲۴ ساعتونو کې دوه ځلې په دې کښتۍ باندې برید کړی و.
د امریکا پوځ وايي دوه هغه بالستیک میزایل یې هم ویجاړ کړي چې د اکمالاتي کښتۍ د وېشتلو لپاره توغول شوي وو.
حوثي یاغیانو له سرې بحیرې څخه تېرېدونکې کښتۍ په نښه کوي او وايي چې دا کار د غزې په ننګه کوي. له دغې لارې څخه د نړۍ ۱۲ په سلو کې تجارتي توکي انتقالېږي او په دغو بریدونو سره د انتقال دا بهیر له خطر سره مخامخ شوی دی.
متحدو ایالتونو د دغو بریدونو د مخنیوي او له سرې بحیرې څخه د کښتیو د ارام انتقال لپاره د څو ملتونو یو ګډ ځواک جوړ کړ.
د اکتوبر په اوومه نېټه د اسرائیل او حماس ترمنځ د جګړې له پیل راهېسې په سیمه کې د حوثي یاغیانو خوځښتونه زیات شوي دي.
په سوریې او عراق کې دېره امریکایي ځواکونه وايي چې په وار وار پرې د بې پیلوټه الوتکو او راکټ بریدونه شوي دي.
واشنګټن وايي وسله والې ډلې د ایران په مرسته دا بریدونه کوي، خو تهران دا ادعا ردوي.
فورم \ دبحث خونه