د ناروې د دفاع وزارت وایي د امریکا د سمندري ځواکونو د هغو څلورو سرتیرو مړي پیدا شول چې د ناټو د پوځي تمریناتو پر وخت یې الوتکه نسکوره شوې وه.
د دفاع وزارت په اعلامیې کې ویل شوي چې یوې ژغورونکې هیلکوپترې د دې امریکایي سرتیرو مړي د ناروې په شمال کې د بوډو په جنوبي برخې کې پیدا کړي.
د دې امریکايي سرتیرو (V-228 Ospery) الوتکه د جمعي په ورځ مارچ ۱۸ په همدې سیمې کې د ناټو په تمریناتو کې ورکه شوې وه. د ناروې د دفاع وزارت ویلي چې د دې امریکايي سرتیرو مړي به متحده ایالاتو ته ولیږدول شي.
ناټو پدې نظامي تمریناتو کې د دې سازمان د غړیو هیوادونو او شریکانو شاوخوا ۳۰ زره سرتیري برخه لري چې د سړې هوا لپاره د چمتووالي لپاره کیږي.
په نظامي تمریناتو کې چې ټاکل شوې د اپریل د میاشتې تر اولې نیټې به دوام ولري، شاوخوا ۲۰۰۰ الوتکې او ۵۰ کښتۍ برخه لري.
د پیښې په هکله په لومړنیو معلوماتو کې ویل شوي چې دا الوتکه د غره سره جنګیدلې خو لا دا خبر دقیق شوی ندی او چارواکي وایي پدې هکله پلټنې روانې دي.
د پولیسو د پلټنې د ډلې مشر کرسشین وکران کارلسن ویلي چې د پیښې په ځای کې د خرابې هوا له کبله د ژغورنې او لټون عملیات ډیر سخت و خو زیاتوي چې د جسدونو پیدا کول د هغوي لپاره لومړیتوب درلود.
په همدې حال کې په ناروې کې مطبوعاتو ویلي چې د الوتکې تور بکس میندل شوی چې د پلټونکو سره به پیښې په هکله په پلټنو کې مرسته وکړي.