د متحدو ایالتونو د بهرنیو چارو وزیر انتوني بلینکن وايي، چې د حماس له بریدونو وروسته امریکا له اسرائیل سره د خپلو نویو پوځي مرستو جزیات اعلانوي.
بلینکن نن یکشنبه اکتوبر اتمه (تلې۱۶) سي ان ان تلویزونه ته وویل: "موږ د اسرائیل مشخص وړاندیزونه له نظره تېروو. فکر کوم چې نن د ورځې تر پای پورې به جزیات ولرو. "
هغه وویل:"د ولسمشر لارښوونه دا وه چې ډاډ ترلاسه شي هر څه چې لازم وي اسرائیل ته برابر کړل شي چې د حماس بریدونو ته رسیدګي وشي. "
د حماس ډلې د شنبې په ورځ ناببره په اسرائیل باندې بریدونه پیل کړل، زرګونه راکټونه یې پرې وتوغول او جنیګالي يې اسرائیل ته ننوتل.
د اسرائیل مقامات وايي چې په دغو بریدونو کې شاوخوا ۶۰۰ اسرائیلیان وژل شوي او ۲۰۰۰ نور ژوبل دي. چارواکو د ۲۰۰ روغتیايي حالت خراب ښودلی دی.
د حماس جنګیالیو په دغه برید کې هم د اسرائیل سرتېري او هم ولسي خلک یرغمل کړي او یو شمېر یې غزې ته انتقال کړي دي.
په غزې کې مقاماتو ویلي دي چې د اسرائیل په بریدونو کې ۳۷۰ تنه وژل شوي او څه باندې ۱۸۰۰ نور ژوبل شوي دي. بلینکن وویل چې د حماس د بریدونو په مهال د امریکایانو د ورکېدو راپورونه هم خپاره شوي دي، مشخص یې ونه ویل چې څومره امریکایان وژل شوي او ژوبل شوي دي.
د امریکا ولسمشر جوبایډن دا بریدونه غندلي دي او اعلان یې کړی چې د اسرائیل حکومت ته به مناسب امکانات ورکړي چې د "تروریستي بریدونو" په وړاندې د ځان او خپلو خلکو دفاع وکړي.
ولسمشر جوبایډن د حماس بریدونه "وحشتناک" بللي دي. هغه په سپینې ماڼۍ کې په یوې تلویزوني وینا کې وویل: "ما هغه (بنیامین نتانیاهو) ته وویل چې متحده ایالتونه د دغو تروریستي بریدونو په مقابل کې د اسرائیل د خلکو تر څنګ کلک ولاړ دی. اسرائیل د ځان او د خپلو خلکو د دفاع حق لري."
ولسمشر بایډن وویل: "زما په اداره کې د اسرائیل د امنیت ملاتړ کول ثابت او پایداره دي. موږ به ډاډ ترلاسه کړو چې د خپلو خلکو اړتیا وړ مرستې ولري چې د ځان څخه دفاع روانه وساتي.
فورم \ دبحث خونه