په متحدو ایالتونو کې د افغانانو د مېشتولو لایحه (Afghan Adjustment Act)، چې په اساس به یې زرګونو افغانانو ته دایمي اقامه ورکول کېده او د ژوند نور امکانات برابرېدل، په کانګرس کې منظوره نشوه، خو د کانګرس غړیو افغانانو ته د مهاجرت ۴۰۰۰ نویو ځانګړو ویزو (SIV) د ورکولو وړاندیز وکړ.
امریکايي سناتورې جین شهین، چې په متحدو ایالتونو کې د افغانانو د مېشتولو د پروګرام کلکه پلوۍ ده، تېره ورځ وویل چې د حزبي نظري اختلافاتو له کبله په وروستۍ شېبې کې دې ستونزې ته د حل لاره پیدا شوه او وړاندیز وشو چې ۴۰۰۰ د مهاجرت ځانګړو ویزو طرحه دې وړاندې شي.
د ۲۰۲۱ د اګست په میاشت کې، چې امریکایان له افغانستان څخه ووتل، شاوخوا ۸۰زره افغانان متحدو ایالتونو ته انتقال کړل شول، په دوی کې یې یو شمېر د ځانګړو ویزو مستحق بلل کېدل خو بشر دوستانه ویزې ورکړل شوې.
که په امریکا کې د افغانان د مېشتولو لایحه منظوره شي، متحدو ایالتونو ته د بشر دوستانه ویزو په اساس انتقال کړل شویو افغانانو ته به د دایمي اقامې د اخیستلو لاره پرانیستل شي، اوس د دوی د ویزو موده دوه کلنه ده.
دموکراتان او یو شمېر جمهوریت غوښتونکي د دغې لایحې ننګه کوي. سپينې ماڼۍ هم د کانګرس له غړو غوښتي دي چې دا لایحه منظوره کړي.
تېره اونۍ د سپینې ماڼۍ ویاندې کارین جین پیري په خبري کنفرانس کې په دې اړه وویل: « موږ د افغانانو د مېشتولو د طرحې د تصویب په اړه د کانګرس د روانو هڅو کلک ملاتړ کوو. او موږ له کانګرس څخه هم غواړو او دا [هڅه] به روانه ساتو چې دا قانون د ولسمشر مخې ته کېږدو چې د افغانانو د ثابتې قانوني دایمي اقامې لپاره لاره برابره شي.»
د دغې طرحې د منظورۍ لپاره له څو میاشتو راهېسې یو شمېر افغانانو د کانګرس د ودانۍ مخې ته پرلت پیل کړی دی.
دا په داسې حال کې ده چې افغانستان لپاره د امریکا د پخوانیو سفیرانو یوې ډلې په یوه لیک کې د امریکا له قانون جوړوونکو څخه غوښتي دي چې باید دا طرحه د امریکا د راتلونکي کال په بودیجه کې شامله کړي.
سفیرانو په لیک کې چې تېره ورځ کانګرس ته لېږل شوی راغلي: "دا طرحه زموږ له متحدانو سره د جنګ په وخت کې شوې لازمي ژمنې عملي کوي. دا یو اخلاقي مسئولیت دی او همدارنګه دا خبره یقیني کوي چې په راتلونکو جنګونو کې به ملاتړي ومومو."
دا لیک د راین کراکر، رونالډ نیومن، ویلیم ووډ، ارل انتوني وین، جیمز کننګهم، پي مایکل مک کینلي، هوګو لارنس او راس ویلسن لخوا لاسلیک شوی.
