د متحدو ایالتونو د استازو مجلس د پنجشنبې په ورځ ۱۷ جولاۍ (۲۶سرطان) پر سعودي عربستان د وسلو د پلورلو پر ضد رایه ورکړه.
پر سعودي د وسلو پلورلو د دغه تړون ارزښت ۸.۱ میلیارد ډالره دی. ولسمشر ټرمپ ویلي دي چې د استازومجلس دا پرېکړه به ویتو کړي.
د ولسمشر ټرمپ ادارې د مۍ په میاشت کې هلې ځلې وکړې چې د کانګرس له تصویب پرته د "ایران د ممکنه ګواښ د مخنیوي" په نامه دا تړون وکړي.
ښاغلی ټرمپ غواړي چې سعودي عربستان، متحده عرب امارات او اردن سره د الوتکو د ساتلو او مراقبت، رهبري کېدونکي راکټونو او د نورو وسلو او تجهیزاتو د پلورلو ۲۲ تړونونه لاسلیک کړي.
خو په یمن کې د سعودي جګړې، د بشري حقونو څخه د سعودي د حکومت سرغړونې او د یو سعودي خبریال جمال خاشقچي وژلو امریکایي استازي خواشیني او قهر کړي دي.
د استازو په مجلس کې د بهرنیو اړیکو د کمېټې مشر الیوت انګل وویل " موږ وینو چې په یمن کې څه روان دي او د متحدو ایالتونو لپاره په کار ده چې په دې اړه لاس په کار شي."
خو د امریکا د بهرنیو چارو وزیر مایک پمپیو ویلي وو چې امریکا د ایران له لورې یو پېښ شوي خطر ته د ځواب ورکولو لپاره دا کار کوي.
د امریکا دموکرات سیاستوال مني چې د ایران له ملاتړ برخمنو حوثي یاغیانو ګواښ جدي دی، خو وايي چې په یمن کې د سعودي په مشرۍ جنګ کې د ولسي خلکو په وژلو هم سترګې نشي پټېدای.
