د امریکا د متحده ایالتونو په کولراډو ایالت کې د پنجشنبې په ورځ ډسمبر ۳۰ (مرغومي نهمه) زرګونو خلکو ته امر شوی چې له خپلو کورونو څخه ووځي.
په یاد ایالت کې د بې سارې وچکالۍ له امله په ځنګلونو کې پراخ اور بل شوی او دغه اور نورو سیمو ته په چټکۍ د پراخیدو په حال کې دی.
ویل کیږي چې په یو شمیر سیمو کې د سختو بادونو له امله د بریښنا پایې هم راغورځیدلي دي.
د امریکا د هوا پيژندنې ملي ادارې وضعیت ژوند ته ګواښ پيښونکی بللی او د یاد ایالت د لویسویل ۲۰ زره او د سوپریر ښار ۱۳ زره اوسیدونکو ته ویل شوي چې خپل کورونه پریږدي.
په یو شمیر سیمو کې د باد سرعت په ساعت کې ۱۶۰ کیلومتره اټکل شوی او د اور د سختو لمبو له امله د اور وژونکو کار هم ستونزمن شوی دی.
د کولراډو والي جارډ پولیس د یوه ټویټ په کولو څرګنده کړې:"د ګړندیو بادونو له امله اور سرعت مخ په خپریردو دی او ټولې الوتکې کینول شوي دي."
د امریکا د یو شمیر غربي ایالتونو په شان کولراډو هم د څو کلونو راهیسې وچکالۍ سره مخ دی او دغه وچه اور لګیدنو ته آسیب پذیره سیمه کړېده.
