یو شمېر کوچیان وایي چې له یو ځای څخه بل ځای ته په کډې کولو سره دوی ته د مرکز کابل په ګډون د افغانستان په ډیرو لرې پرتو سیمو کې روغتیایي خدمتونه، په ځانګړي ډول د ګوزڼ واکسین نه رسیږي.
کابل یو له هغو ولایتونو څخه دی چی د بیلابیلو دلیلونو له امله د هیواد له نورو سیمو څخه ورته د کوچیانو په ګډون یو شمېر کورنۍ د استوګنې په موخه کډه کیږي.
په کابل کې میشت ځیني موسمي کوچیان له روغتیایي ستونزو سر ټکوي او له اړوندو چارواکو غواړي چې د دوی د ماشومانو د واکسین د تطبیق چارې دې ګړندۍ کړي.
یو تن کابل میشتي کوچي میاګل، امریکا غږ ته داسې وویل: " د پسرلې په رارسیدو سره کوچیان کابل او ځیني نورو ولایتونو ته کډه کیږي او د غرونو او دښتو په لمنو کې شپې تیروي، خو ډیری وختونه ېې ماشومان له واکسین څخه بې برخې پاتې کیږي."
بل لوري ته، د کابل ښاریان هم له روغتیایي چارواکو غواړي چې د پولیو ناروغۍ د مخنیوي لپاره دې په ټاکلي وخت د کوچیانو ماشومان واکسین کړي.
د کابل ښار اوسیدونکي سهیل، پدې هکله امریکا غږ ته وویل: "د کوچیانو ماشومانو ته د پولیو واکسین تطبیق ځکه اړین دی چې دوی له یوې سیمې څخه بلې سیمې ته کډه کیږي او د بیلابیلو ناروغیو ترڅنګ د پولیو ویروس د لیږد لامل کیدای شي."
ښاغلی سهیل له روغتیایی مسؤولینو غواړي چې د موسمي کوچیانو د ماشومانو واکسینولو ته دې جدي پاملرنه وکړي او پدې توګه دې د پولیو ناروغۍ د خپریدو مخه ونیسي.
بل پلو، د عامې روغتیا وزارت د پولیو د له منځه وړلو د بیړني مرکز مسؤولین بیا وایي چې دوی تل هڅه کوي چې د کډوالو او کوچیانو ماشومانو ته ټاکلي وخت واکسین ورسوي.
په کابل کې د پولیو د له منځه وړلو د بیړني مرکز مسؤول، ډاکټر نیک ولي شاه مومن امریکا غږ ته وویل: "موږ د هر کال او هر موسم په نوي کیدو سره پر خپل پلان له سره غور کوو او هغه نوی کوو او د پلان مطابق د کوچیانو او نورو کډوالو لپاره د واکسین پروګرام تنظیموو."
د ښاغلي مومن په وینا، د دوی واکسیناتوران د پلان له مخی د کډوالو او کوچیانو د استوګنې سیمو ته ورځي او د هغوی له پنځو کالو څخه کم عمره ماشومانو ته د پولیو واکسین تطبیقوي.
