د اسلامي دولت ډلې یا داعش په سوریې کې د تدمر لرغونی ښار نیولی دی. د دغې ډلې لخوا د تدمر د ښار نیولو دا ویره پیدا کړې چې داسې نه شي چې یو ځل بیا کلتوري نایابه آثار تباه کړل شي.
د سوریې د بشري حقونو موسسه، چې مرکز یې په لندن کې دی، ویلي دي چې د چهارشنبې په ورځ ناوخته د تدمر د ښار په شمالي برخو کې سختې جګړې وشوي او وروسته بیا د سوریې حکومتي قواوي د ښار د نږدې ټولو سیمو نه ووتلي.
تدمر یو لرغوني ښار دی چې ۲۰۰۰ کلن تاریخي قدامت لري. دغه پخوانی ویجاړ شوی ښار د یونسکو د نړیوالو کلتوري میراثونو په لست کې شامل دی.
د سوریې د تاریخي آثارو مشر، مامون عبدالکریم ویلي دي په سلګونو مجسمې یې د دغه ښار نه خوندي ځایونو ته انتقال کړي دي.
خو، په دغه لرغوني خراب شوي ښار کې داسې اثار او لوی څلي هم شته چې د انتقال وړ نه دي.
سوریې او ملګروملتونو د نړیوالو نه غوښتنه کړې چې د دغه لرغوني ښار د ساتلو لپاره دې مرسته وکړي. د اسلامي دولت ډلې د روان کال په پيل کې په عراق کې یو شمیر لرغوني اثار ویجاړ کړل.
د امریکا د بهرنیو چارو د وزارت ویاندې ماري هارف پرون د چهارشنبې په ورځ وویل چې امریکايي چارواکي د اسلامي دولت د ډلې لخوا د تدمر د ښار د نیولو په اړه تشویش لري او هیله لري چې د ښار تاریخي ځایونه وران نه شي.
په عراق کې د یکشنبې په ورځ د اسلامي دولت ډلې د رمادي ښار ونیوی. د دغه ښار د کنټرول لپاره څو ورځې جګړه روانه وه چې ۵۰۰ کسان پکښې وژل شوي وو.