په پاکستان کې د ژغورنې د نړیوالې کمېټې (ای ار سي) مشره شبنم بلوڅ وايي، په پاکستان کې د میشتو افغان کډوالو د خوندیتوب دپاره هلې ځلې کوي خو د نړیوالو مرستو کمیدو دا هڅې ټکنۍ کړي دي.
میرمن بلوڅ وايي پاکستان هم د کوربه هېواد په توګه دغه مرستو ته ګوري.
مېرمن بلوڅ له امریکا غږ سره په ځانګړې مرکې کې وویل: "په لومړیو کې له دې کډوالو سره هر ډول مرستې کېدې، ځکه نړیوالې مرستې ډېري وې. لاکن له تېرو لسو پنځلسو کلونو له دوی سره هیڅ مرستې نه کېږي. دا مرستې د نړیوالو له لوري بندي شوې دي، ځکه پاکستان خو هم د کوربه هیواد په حیث همدې نړیوالو مرستو ته ګوري."
نوموړې وايي، د افغان کډوالو د ستونزو د حل ژمنې وشي خو بیرته هېرې شي. زیاتوي: "او دا ستونزې یوازې په دې نه هوارېږي، چې ته د یو څه وخت لپاره ورته نغدي یا نورې مرستې ورکړې او یا بیا د څو میاشتو لپاره خوراکي توکي ورکړې. له دې سره دا ستونزې نشي هواریدلای."
مېرمن بلوڅ وايي، د ژغورنې نړیوالې کمېټې د پاکستان په خیبر پښتونخوا او بلوچستان ایالتونو کې له افغان کډوالو سره د زده کړې، روغتیا او خوړو برابرولو په برخه کې یو شمېر پروژې پلې کړېدي، خو وايي د کډوالو ډیرې ستونزې لا پر ځای پاتې دي.
په پاکستان کې دا وخت شاوخوا ۱.۵ میلیونه افغان کډوال راجستر دي او د کډوالو د چارو ادارې وايي، په دغه هېواد کې د بې اسناده افغان کډوالو شمېر له دې هم زیات دی.
مېرمن بلوڅ وايي د دوی اداره یوازې د هغو افغانانو سره چې د کډوالو په توګه ثبت شوي دي، مرسته کولای شي.
نوموړې وايي: "تر ۲۰۲۱ کال مخکې هم هغه افغانان چې د کډوالو په حیث یې راجسټریشن نه دی شوی او یا حکومت وايي چې په ناقانونه توګه راغلي دي، موږ له هغوی سره کار نشو کولی. د یوې بشري مرسته کوونکې ادارې په حیث موږ دې کسانو ته یواځې مالومات ورکولای شو."
له شبنم بلوڅ سره بشپړه مرکه دلته وګورئ.
