د کندهار ښار شهیدانو څلور لاري ته نږدې او د یوه مهم تعلیمي مرکز مخ ته په عمومي لار په نشه روږدي کسان په عامه محضر کې نشه يي توکي استعمالوي.
د کندهار ښار اوسیدونکې له دې کبله اندېښن دي او وایي چې په نشه یي توکیو د روږدو کسانو شمېر د ښار په عامه او مرکزي ځایونو کې زیات شوی دی.
دغه راز ځيني نور ښاریان بیا په عامه توګه د نشه يي توکو استعمال د ټولني په زیان ګڼي او له اړوند ادارو څخه غواړي چې د ښار له مرکزي برخو څخه په نشه د روږدو کسانو پرضد دي یو عمومي کمپاین وکړي.
بلي خواته خپله په نشه روږدي کسان وايې چې که د درملنې امکانات ورته برابر شي نو تیار دي چې د نشه يي توکو استعمال پریږدي.
دغه کسان چي اکثریت يې له ایران څخه راغلي زیاتوي چې دوی هم د اعتیاد له ژوند څخه ستړي شوي.
په کندهار کې لاهم په دقیق ډول په نشه د روږدو کسانو شمېر ندی معلوم خو د هیواد په کچه دا شمېر ۳ میلیونه تنه ښودل کیږي.
د کندهار د عامي روغتیا ریاست وايې چې پدې ولایت کې په نشه د روږدو کسانو د درملنې لپاره يې امکانات محدود دي او پدې برخه کې د یوه لوی روغتون د اړتیا په اړه يې له خپل وزارت سره وړاندیزونه شریک کړي دي.
