د خوست په مرکز او ولسواليو کې د مخدراتو د خرڅلاو او استعمال په اړه د خلکو اندېښنه وروسته له هغه لاپسې زياته شوه، چې څو ورځې مخکې په دې حجره کې يو کس د واده د مراسمو پر ګډونوالو بريد وکړ.
ددې پېښې عيني شاهدان او د تڼيو ولسوالۍ حکومتي چارواکي وايي چې بريد ګر د مخدره موادو تر څکولو وروسته د نشې په حالت کې دلته پر خلکو بريد کړی، پنځه کسان يې وژلي او ۱۳ نور يې ټپيان کړي وو.
نبي الله، د تڼيو ولسوالۍ اوسېدونکی وایي ”دا کس له دې دراوزې راننوت، دلته په ناستو کسانو يې پرلپسې ډزې وکړې. مړي او ټپيان دلته پراته وو. بيا د کلي خلک راغلل، مړي او ټپيان يې له دې ځای نه وایستل.‟
د بريدګر ورور شېرعلي خان وايي، چې ورور يې مخکې په ملي اردو کې دنده ترسره کړې وه او څه موده وړاندې يې ترخيض اخيستی و.
شېرعلي د پېښې په اصلي لامل نه پوهېږي، خو زياتوي چې ورور يې کله ناکله ځينې نشه يي توکي څکول. هغه زياته کړه چې د يادې پېښې قربانيان يې نږدې خپلوان دي.
له دې پېښې سره جوخت خلکو پر فېسبوک پر حکومت انتقادونو ته زور ورکړ، چې ګني د مخدره موادو پرضد يې مبارزه قاطع نه ده. خلک د نورو پېښو د مخنيوي لپاره د مخدراتو د خرڅلاو د مخنيوي جدي غوښتنه لري.
که څه هم حکومت کله ناکله د نشه يي موادو د قاچاق او ددې توکو د کاروبار پر وړاندې د جدي مبارزې خبره کوي، خو ددې ولايت اوسېدونکي دا مبارزه کافي نه بولي.
