افغان کرکټ ملي لوبډله په اماراتو کې د کاناډا، ایریلینډ، کینیا او اماراتو سره د فبروري میاشتې په لومړیو دوو اونیو کې پنځه یو ورځینۍ لوبې کوي
افغان کرکټ بورډ ته د کرکټ نړیوالې شورا ډاډ ورکړی چې افغان ملي لوبډله به دوه یو ورځینۍ لوبې د کاناډا، کینیا او یا ایریلینډ هیواد سره کوي او درې نورې یو ورځینۍ لوبې به د متحده عربي اماراتو لوبډلو سره کوي
ایریلینډ، کاناډا او کینیا د نړیوالو یو ورځینیو سیالیو جام لپاره د دوبۍ په ښار کې چمتوالی نیسي، د نوموړو لوبډلو څخه به دوه هیوادونه دوه ۵۰ اوریزه لوبې د افغانستان سره د فبروري په ۶ او ۸ نېټه کوي
د افغان ملي لوبډلې به درې نورې یو ورځينۍ لوبې د متحده عربي اماراتو د ملي لوبډلې سره کوي چې تر اوسه لا نه ده ټاکل شوي چې د فبروري په څومه نېټه به وي
افغان ملي لوبډله به د حمید حسن په مشرۍ متحده عربي اماراتو ته د جنوري په ۲۷ نېټه سفر کوي او دا ټولې لوبې به د افغان ملي لوبډلې په کورني کرکټ سټډیم( شارجه) مې ترسره کیږي
د دې لوبو لپاره افغان کرکټ ملي لوبډله په لاندې ډول ده
حمید حسن ، نوروز منګل ، کریم صادق ، نور علي ځدران ، شاپور ځدران ، میرویس اشرف خروټی ، شفیق الله شفق ، ګلبدین نایب ، سمیع الله شینواری ، شبیر نوري ، عبدالله مزاري ، محمد سمیع اغا ، محمد شهزاد ، محمدنبی عیسی خیل ، جاوید احمدي او اصغر سلام خېل.
بل خوا، د افغانستان د ۱۹ کلنو څخه کم عمره ملي لوبډله په پاکستان کښی خپلو سیالو لوبډلو سره لوبې کوي
د افغانستان د ۱۹ کلنو څخه کم عمره ملي لوبډله په کراچۍ کې تمریني لوبې او تمرینات کوي، نوموړې ملي لوبډله به د جنورې په ۲۷ نېټه د تایلیند هیواد ته له پاکستانه سفر کوي
افغان لوبډله به د اسیایي هیوادنو د ۱۹ کلنو څخه کم عمره لوبډلو د ایلیټ کپ په سیالۍ کې برخه اخلي، په دې سیالۍ کې ۱۰ هیوادونه ګډون کوي چې د فبروري په لومړۍ نېټه به پېل کیږي
افغان ۱۹ کلنو څخه کم عمره ملي لوبډله د جنوري د میاشتې د ۵ نېټې راپدېخوا د پاکستان په هیواد کې د تایلینډ هیواد ویزو، تمرینونو او تمریني لوبو لپاره ده، په اسلام اباد کې یې د خپلو سیالو لوبډلو سره درې لوبې وکړې چې یوه یې ترې وګټله او نورې لوبې او تمرینونه یې په کراچۍ کې پېل کړي چې تر دې دمه یې یو لوبه د راشد لطیف د اکاډمۍ لوبډلې څخه ګټلې او نورې لوبې به هم کوي
د راشد لطیف اکاډمۍ لوبډلې پچه ګټلې و او په ۲۸ اورونو کې افغان لوبډلې ته ۹۱ منډې هدف وټاکه. افغان ۱۹ کلنو څخه کم عمره ملي لوبډلې ټاکل شوی هدف په ۱۱ اورو کې د یو لوبغاړي په سوځیدلو پوره کړاو لوبه یې وګټله
اوس مهال نوموړې لوبډله په تمریناتو بوخته ده او په ۲۷ نېټه به د تایلینډ هیواد ته سفر کوي
د اسیايي هیوادنو د ۱۹ کلنو څخه کم عمره ایليټ جام کې د لاندې هیوادونو لوبډلې ګډون کوي او په دوو ګروپونو ویشل شوې دي
ای ګروپ: هانګ کانګ، قطر، مالیزیا، سینګاپور، بحرین
ب ګروپ: افغانستان، نیپال، متحده عربي امارات، عمان، تایلینډ
افغانستان په ب ګروپ کې د نیپال ، عربی متحده امارات ، عمان ، ټایلینډ سره لوبې کوي
افغانستان لومړۍ لوبه د تایلینډ هیواد سره د فبروري په لومړۍ نېټه، دویمه لوبه د عمان سره د فبروري په دریمه نېټه، دریمه لوبه یې په څلورمه نېټه د نیپال سره او څلورمه لوبه یې په شپږمه نېټه د متحده عربي اماراتو سره کوي