د بنګله دیش د کرکټ مسئولین وايي تکړه توپ وهونکی لیټن داس ساري تبې نیولی او له کبله یې د اسیا جام په سیالیو کې ګډون نشي کولی.
د اسیا کپ ۵۰ اوریزو سیالیو کې بنګله دیش د پنجشنبې په ورځ اګست ۳۱ (وږي نهمه) له کوربه سريلانکا سره لوبه لري او د یکشنبې په ورځ له افغانستان سره مخامخ کیږي.
د بنګله دېش کرکټ بورډ ویلي چې لیټن د سفر توان نه لري او د هغه پر ځای یې انعام الحق نومولی دی.
دېرش کلن انعام الحق تر اوسه د بنګله دیش دپاره په ۴۴ یو ورځنیو نړیوالو لوبو کې د درې سلیزو په ګډون ۱۲۵۴ منډې کړي دي. د هغه وروستۍ یو ورځنۍ لوبه د دسمبر په میاشت کې د هند په وړاندې وه.
د بنګله دیش د کرکټ بورډ د غوراوي کمېټې مشر منهاج العابدین وویل: "د لیټن د نه شتون له کبله، موږ یو ټاپ توپ وهونکي ته اړتیا درلوده چې وکولای شي ویکټ وساتي، او انعام الحق دا مسئولیت قبول کړ."
اسیا جام د سیمې د ټیمونو لپاره وروستی چانس دی چې د اکتوبر په میاشت کې په هند کې د نړیوال جام څخه مخکې خپله وړتیا وښيي.
بنګله دېش په ب ګروپ کې له سریلانکا او افغانستان سره لوبه کوي. په الف ګروپ کې، پاکستان، هند او نیپال ځای لري.
د دې جام لومړۍ لوبه د چهارشنبې په ورځ د پاکستان او نیپال تر منځ د پاکستان په ملتان کې د کوربه هېواد په ګټه پای ته ورسېده.
ټاکل شوې وه چې یوازې پاکستان ددې لوبو کوربه وي. خو د پاکستان او سریلانکا د ګډ کوربه توب پریکړه وروسته له هغه وشوه چې د هند لوبډلې پاکستان ته له سفر کولو څخه انکار وکړ.
د اسیا جام پای لوبه د سپتمبر په ۱۷ د سريلانکا په پایتخت کولمبو کې کیږي.
فورم \ دبحث خونه