د افغان حکومت او د ملګرو ملتونو د مرستندویه ادارې (یوناما) ترمنځ د اختلاف اصلي ټکی د هغو ملکي خلکو په مرګ ژوبلې کې کمی دی چې د طالبانو په ځمکنیو پوځي عملیاتو کې زیانمن شوي دي.
یوناما وايي چې د ۲۰۱۴ په پرتله په ۲۰۱۵ کال کې د طالبانو په بریدونو کې د ملکي خلکو مرګ ژوبله ۴۲ سلنه ټیټه وه.
خو ارګ وايي لدې موندنې سره موافق ندی.
افغان حکومت وايي چې ملکي تلفات له دې کبله کم شوي چې، ډېرو خلکو د طالبانو د توغندیزو او نورو بریدونو له ویرې خپل کورونه پرېښي او نورو سیمو ته تښتېدلي دي، نه دا چې طالبانو د ملکي تلفاتو مخه نیولې ده.
دغه راز د اجرایي ریاست یو ویاند جاوید فیصل امریکا غږ اشنا ته د اختلاف وړ بل اړخ داسې بیان کړ "د یوناما په راپور کې یوازې د ۱۲ نا امنه ولایتونو ارقام راټول شوي، خو په راپور کې د ۲۴ نورو ولایتونو په اړه، چې طالبانو په ځانمرګو بریدونو او چاودونو کې خلک وژلي او ترور کړي، هېڅ یادونه نه ده شوې، بنآ د راپور ارقام سم او د منلو نه دي."
ښاغلي فیصل همدغه راز دا هم د پوښتنې وړ موضوع وبلله چې ولې یوناما په خپل راپور کې د ۱۳ فیصده ملکیانو پر وژلو هېڅ څوک ګرم نه دي بللي.
ارګ وايي د یوناما راپور په ټول افغانستان کې د روان تاوتریخوالي بشپړ تصویر نه وړاندې کوي.
د طالبانو غبرګون
په همدې حال کې طالبانو هم د یوناما د راپور په اړه په خپل غبرګون کې دا خبره نه مني چې ګنې دوی دې ډېر ولسي افغانان وژلي وي.
د طالبانو په اعلامیه کې راغلي " موږ د ملګرو ملتونو خپور شوی راپور یو لوریز- اړخیز- بولي. "
طالبانو د ولسي افغانانو د مرګ ژوبلې ډېر مسولیت پر افغان امنیتي ځواکونو سیمه ییزو پولیسو او نورو ناقانونه وسله والو ډلې اچولی دی.
په همدې حال کې یوناما د ملکي تلفاتو د کچې د کمولو غږ کړی دی، خو افغان حکومت او طالبانو بیا د ملکيانو ساتل خپله اصلي دنده بللې ده.
یوناما د ۲۰۰۹ کال راهیسې په افغانستان کې په روان تاوتریخوالي کې د ولسي خلکو تلفات ثبت او مستند کړي دي.
د یوناما شمیرې ښیي چې په تیرو اوو کلونو کې څه باندې شل زره افغان ملکیان په جګړو او چاودنو کې وژل شويدي.
