د افغانستان د کرکټ ملي لوبډلې د ۲۰۲۴ کال شل اوریزو نړیوال جام سیالیو کې خپله دویمه پرلپسې لوبه وګټله او پخپل ګروپ کې په لومړي مقام کې ده.
د جمعې جون اوومې (غبرګولي ۱۸) لوبې کې افغانستان د نیوزلینډ لوبډلې ته د ۸۴منډو په توپیر ستره ماته ورکړه. د لوبډلې کپتان راشد خان وایي دا په شل اوریزو نړیوالو لوبو کې د افغانستان تر ټولو ستر بری دی.
افغانستان د توپ وهنې په نوبت کې په پوره شلو اورونو کې ۱۵۹ منډې وکړلې او سیالې لوبډلې ته یې د ګټلو لپاره د ۱۶۰ منډو هدف وټاکه چې هغوي پوره نشوی کړی او ټول لوبغاړي یې پداسې حال کې د لوبې په ۱۵.۲ اورونو کې وسوځیدل چې یوازې ۷۵ منډې یې کړې وې.
پچه د نیوزلینډ لوبډلې وګټله خو د توپ وهنې نوبت یې لومړی افغانستان ته ورکړ او د تیرې لوبې په څیر د افغانستان د سر دوو لوبغاړو – رحمان الله ګربز او ابراهیم ځدراڼ – ښه پیل وکړ.
سره لدې چې په لومړنیو ۱۰ اورونو کې د افغان لوبغاړو منډې کول یو څه پڅ و خو تر لسم اور وروسته ګربز او ځدراڼ د منډو کول چټک کړل او پداسې حال کې چې دواړو یې په ګډه تر ۱۰۰ ډیرې منډې کړې وې، یو یې هم نه و سوځیدلی.
رحمان الله ګربز د لوبې په شلم اور کې وسوځید او په ۵۵ توپونو یې اتیا منډې وکړلې. هغه د لوبې غوره لوبغاړی هم وټاکل شو. ابراهیم ځدراڼ ۴۴ منډې وکړلې.
ګربز په لومړۍ او دویمې لوبې کې په پرلپسې توګه تر ۵۰ ډیرې منډې وکړلې او پدې سره د روان نړیوال جام د ډیرو منډو جوړوونکو لوبغاړو په جدول کې لومړی مقام لري.
هغه په لومړۍ لوبې کې چې د یوګانډا سره وه، په ۴۵ توپونو یې ۷۶ منډې کړې وې او په نننۍ لوبې کې بیا پداسې حال کې د لوبې په شلم اور کې وسوځید چې په ۵۶ توپونو یې ۸۰ منډې وکړلې.
په توپ اچونې کې د افغانستان لپاره تر ټولو غوره لوبه بیا هم د تیرې لوبې په څیر تیز توپ اچوونکي فضل الحق فاروقي وکړله.
فاروقي د لوبې لومړي اور په لومړي توپ د نیوزلینډ یو لوبغاړی وسوځوه چې تر هغې وروسته د سیالې لوبډلې لوبغاړي یو په بل پسې پرته لدې چې ډیرې منډې وکړي، سوځیدل.
فاروقي په نننۍ لوبې کې په ۳.۲ اورونو کې یوازې ۱۷ منډې ورکړې او د سیالې لوبډلې څلور لوبغاړي یې وسوځول.
که ګربز د ډیرو منډو جوړولو لوبغاړو په جدول کې لومړی مقام لري ها خوا بیا فضل الحق فاروقی د روان شل اوریز نړیوال جام په سیالیو کې د ډیرو لوبغاړو سوځولو په جدول کې لومړی مقام لري.
هغه په لومړۍ لوبې کې چې د یوګانډا سره وه، په څلورو اورونو کې یوازې نهه منډې ورکړې او د سیالې لوبډلې پنځه لوبغاړي یې وسوځول چې د لوبې غوره لوبغاړی هم وټاکل شو.
د لوبې پای ته رسیدو وروسته د افغانستان د کرکټ ملي لوبډلې کپتان راشد خان وویل چې دا په شل اوریزو نړیوالو لوبو کې د افغانستان تر ټولو ستر بری دی.
پدې سیالیو کې د افغانستان درییمه لوبه د روانې جون میاشتې په ۱۳ مې د پاپوا نیو ګیني سره ده.
فورم \ دبحث خونه