د ولسي جرګې د نوماندانو د ټاکنیزو مبارزو په پیلیدو سره د چاپي مطبعو کاروبار هم ښه شوی دی.
په کابل کې په لسګونو مطبعې د ولسي جرګې د ټاکنیزو مبارزو لپاره کاندیدانو ته د تبلیغاتي توکو پر چاپ بوختې دي. د دغو مطبعو مسئولان وایي چې د ټاکنیزو کمپاینونو له امله یې کاروبار ښه شوی او آن د شپې هم کار کوي.
د دغو مطبعو د مسئولانو په خبره چې نه یوازې نارینه کاندیدان په ټاکنیزو سیالیو کې پر چاپ لګښت کوي، بلکې ښځینه کاندیدانې هم د رایه اچوونکو د جلبولو لپاره زیات تبلیغاتي مواد چاپوي.
بل خوا د ټاکنو خپلواک کمیسیون وايي چې د کمپاین لپاره د هر ولایت د کاندیدانو د لګښت کچه مالومه ده، دغه کمیسیون وايي چې دوی د کمپاینونو څارنه کوي او له قانون څخه د سرغړونو مخه نیسي.
د افغانستان د ټاکنو خپلواک کمیسیون وايي چې د کاندیدانو لپاره یې د کمپاین د لګښتونو کچه د سیمو او د هغوی د نفوسو پر اساس ټاکلې، د دغه کمیسیون په خبره تر ټولو کم یې لوګر دی چې یو کاندید یې تر نهه سوه زره افغانۍ لګښت کولای شي او تر ټولو زیات بیا کابل دیچې یو کاندید یې تر دوه میلیونه او اته نیم سوه زره لګښت کولای شي
د ولسي جرګې ټاکنو کې دا ځل ۲۴۹ څوکیو ته ته ۲۵۶۵ کاندیدان په انتخاباتي مبارزو بوخت دي، د ولسي جرګې ټاکنې به ۱۳۹۷ لمریز کال د تلې په ۲۸ مه نیټه ترسره شي.
