په افغانستان کې د پوليو یا د ماشومانو د ګوزڼ یوه بله نوې مثبته پېښه نن سې شنبې د «لېندۍ پر شپږ مه» په روزګان ولایت کې ثبت شوې ده.
روغتیايي مقامات وايي چې د ګوزڼ دغه پېښه د یاد ولایت په شهید حساس ولسوالۍ ثبت شوې ده.
د جنوبي حوزې د کتلوي معافیت رئیس ډاکټر عبدالشکور نصر نن سې شنبې امریکا غږ اشنا راډیو ته وويل چې د ګوزڼ د نوې مثبتې پېښې طبي معاینات يې تازه تر لاسه کړي دي.
نوموړي زیاته کړه چې ګوزڼ وهلی ماشوم هلک دی او درې کاله عمر لري.
ښاغلي نصر وویل:"په روزګان ولایت کې موږ مخکې هم یوه بله مثبته پېښه لرل نوې پېښه دا څرګنده وي چې روزګان ولایت هم زموږ په حوزه کې د پوليو تر جدي ګواښ لاندې دی او باید چې د ماشومانو وقايې ته کورنۍ پام زیات کړي."
پر همدې مهال د روزګان روغتیايي مقامات وايي هم چې د ګوزڼ وهلي ماشوم کورنۍ له واکسین سره مخالفت در لود.
د نوموړي ولایت د عامي روغتیا رئیس ډاکټر خان اغا میاخېل امریکا غږ اشنا راډیو ته وويل چې د ګوزڼ وهلي ماشوم کورنۍ د شهید حساس ولسوالۍ د کورک د کلي اوسېدونکې ده او ماشوم ته يې هېڅ کله هم واکسین نه دی ور کړی.
ښاغلي میاخېل وویل:"شهید حسان ولسوالۍ کې له تېرو ۸ میاشتو راهیسې واکسین نه دی عملي شوی، د ځايي خلګو پوهه هم د واکسین د ارزښت په اړه کمه ده او د ګوزڼ وهلي ماشوم کورنۍ هم له واکسین سره مخالفت در لود."
روغتیايي مقامات وايي چې د ګوزڼ د نویو پېښو له زیات والي سره به د واکسین د عملي کولو په کمپاینونو کې له نویو لارو چارو څخه ګټه واخلي.
د دولت وسله وال مخالفین د جنوبي ولایتونو په نا امنه ولسوالیو کې له تېرو ۸ میاشتو راهیسې کور په کور د واکسین له تطبیق سره مخالفت لري او پر ځای يې غوښتنه کړې چې یاد واکسین دي کلي په کلي عملي شي.
د جنوبي حوزې د کتلوي معافیت رئیس ډاکټر عبدالشکور نصر په دې اړه وايي چې له واکسین څخه پاته ماشومانو ته د رسېدو لپاره خپلي تګلاري ته تغیر ور کوي او هڅه يې داده چې تر هر ماشوم پوري واکسین ورسوي.
نوموړی زیاته وي چې د پېښې په اړه دوی اندېښمن دي او په روان کال کې په جنوبي حوزه کې تر ټولو زیاتي مثبتې پېښې ثبت شوي دي.
لهدې سره په افغانستان کې د روان مېلادي کال په ترڅ کې د پوليو د ټولو پېښو شمېر ۲۰ ته ورسېد چې ۱۴ یې یوازې په کندهار، روزګان او هلمند ولایتونو کې ثبت شوي دي.
