په ترین کوټ کې د نړیوالو ځواکونو په اډې کې په یوې جوړې شوې غونډې کي د استرالیا صدراعظم ټوني اېبټ، د دفاع وزیر ډیویډ جانسټن، د مخالف کارگر گوند مشر بیل شارټن او یو شمیر افغان چارواکو گډون درلود.
په غونډه کې د امنیت مسئولیت له نړیوالو ځواکونو څخه افغان ځواکونو ته وسپارل شو.
په هغې اعلامیې کې چې د استرالیا د صدراعظم د دفتر له خوا خپره شوې، ویل شوي چې هغه څه دپاسه زر استرالیایي سرتیري چې په افغانستان کې مېشت دي، د روان کال تر پاپه پورې به بېرته خپل هیواد ته ستانه شي.
د روزګان ولایتي چارواکي وايي چې استرالیایي ځواکونو د ولایت د بیارغونې په پروژو او د امنيت په خوندي ساتلو کې ځانگړی رول لوبولی دی او د تېرو دریو کالونو راهیسی یې د پوځي ماموریت تر څنګ د ولایتي بیارغاونې چارې هم پر مخ بیولي دي.
د اروزګان د والي ویاند عبدالله همت امریکا غږ اشنا راډیو ته وويل چې د اسټرالیا په مالي لګښت د لویو لارو، ښوونځیو ، دولتي تاسيساتو، هوايي ډګر، او د ګڼو کوچنیو پرو ژو کارونه عملي شوي.
ولایتي چارواکي وايي که څه هم افغان قواوې په دغه ولایت کې د امنيت د خوندیتوب بشپړه وړتیا لري خو د نړیوالو ځواکونو يوه ځانګړتیا دا وه چې د رغنیزو کارونو له لارې يې د امنیت ساتلو ته توجه لرله.
د اروزګان والي امیرمحمد اخندزاده وايي چې د نړیوالې ټولنې په مرسته د تېرو نهو کالونو په ترڅ کې په اروزګان کې د عملي شویو پروژو په مټ ددغه ولایت د اوسېدونکو په اقتصادي ژوند کې د پام وړ بدلون راغلی دی.
